ಕೆಲವು ನಟಿಯರು ರಾತ್ರೋ ರಾತ್ರಿ ಕೋಟಿ ಕೋಟಿ ಸಂಪಾದಿಸಿ ಶ್ರೀಮಂತಿಕೆ ವೈಭವ ಗಳನ್ನು ಪಡೆಯುವುದು ಹೇಗೆ ಎಂಬುದರ ಬಿಸಿ ಬಿಸಿ ಚರ್ಚೆ ಈಗ ನಡೆಯುತ್ತಿದೆ. ಆದರೆ ಇಂತಹ ವಿಷಯ ಮಾತನಾಡಲು ಈಗಲೂ ಹೆಚ್ಚಿನವರಿಗೆ ಅಂಜಿಕೆ ಅಥವಾ ಮುಜುಗರವಾಗುತ್ತದೆ. ಹೆಣ್ಣು ಮಕ್ಕಳ ಬಗ್ಗೆ ಹಾಗೆಲ್ಲಾ ಮಾತನಾಡುವುದು ತರವಲ್ಲ. ಎಂಬ ಸೌಜನ್ಯದ ನಡೆಗೆ ಅವರೆಲ್ಲರೂ ಈಗಲೂ ಬದ್ಧ.
ಆದ್ದರಿಂದ ಇಲ್ಲಿ ಹೆಣ್ಣು ಮಕ್ಕಳ ಬಗ್ಗೆ ಚರ್ಚೆ ಮಾಡುವುದಿಲ್ಲ. ಆದರೆ ಗಂಡಸರ ಪೈಕಿ ಒಂದೆರಡು ಸಿನಿಮಾ ಮಾಡಿ ತಾರಾ ಪಟ್ಟ ಏರಿಸಿಕೊಂಡು ಅನೇಕರು ಸ್ಟಾರ್ ಗಿರಿಯ ಜೊತೆಗೆ ಕೋಟಿ ಕೋಟಿ ಹೇಗೆ ಮಾಡಿಕೊಂಡರೆಂಬುದರ ಕುರಿತು ನಿದರ್ಶನ ಬೇಕಾದರೆ ನೀಡಬಹುದು. ಹೌದು ಒಂದು ಅಥವಾ ಎರಡು ಸಿನಿಮಾ ಮಾಡಿದವರು ಮೂರನೇ ಸಿನಿಮಾ ಆಗುವಷ್ಟರಲ್ಲಿ ಬೆಂಜ್, ಬಿಎಂಡಬ್ಲ್ಯು, ಆಡಿಯಂಥಹ ನ ಕಾರಿನಲ್ಲಿ ಹೇಗೆ ಓಡಾಡುತ್ತಾರೆ.
ಸಿನಿಮಾ ಎಂಬ ಬಣ್ಣದ ಲೋಕದಲ್ಲಿ ಏನು ಬೇಕಾದರೂ ಆಗುತ್ತದೆ. ಒಬ್ಬ ಹೊಸಬನನ್ನು ಹಾಕಿಕೊಂಡು ಚಿತ್ರ ಮಾಡಿದ ಎದೆಗಾರಿಕೆಗೆ ಹೆಚ್ಚಿನ ನಿರ್ಮಾಪಕರು ಬೀದಿ ಪಾಲಾಗುತ್ತಾರೆ.. ಇಲ್ಲವೇ ಸಾಲದ ಹೊರೆಯಲ್ಲಿ ನರಳಾಡುತ್ತಾರೆ. ಆದರೆ ಮುಂದಿನ ಚಿತ್ರಕ್ಕೆ ಹೋದ ನಟ ಹೇಗೆ ಸಂಭಾವನೆ ಏರಿಸಿಕೊಳ್ಳುತ್ತಾ ಶ್ರೀಮಂತನಾಗುತ್ತಾನೆ ಎಂಬುದಕ್ಕೆ ಆರ್ಥಿಕತೆ ನಿರ್ವಹಣೆ ಮಾಡುವ ಆತನ ಚಮತ್ಕಾರಿಕೆ ಇಲ್ಲಿ ಕೆಲಸ ಮಾಡುತ್ತದೆ ಎಂಬುದನ್ನು ಬಲ್ಲವರೇ ಬಲ್ಲರು.
ಹೌದು ಸ್ಟಾರ್ ಗಿರಿ ಹೇಗೆ ಹುಟ್ಟುತ್ತದೆ ಮತ್ತು ಸ್ಟಾರ್ ವ್ಯಾಲ್ಯೂಗೆಂದು ಕೋಟಿ ಕೋಟಿ ಹೇಗೆ ಸಾಧ್ಯತೆ ಪಡೆಯುತ್ತದೆ ಎಂಬುದೆಲ್ಲವೂ ಚಮತ್ಕಾರಿಕ ವಿಷಯವೇ.
ಒಂದು ಚಿತ್ರ ಬಿಡುಗಡೆಯಾದ ಬಳಿಕ ಆ ಚಿತ್ರ ಸಾಧಾರಣ ಸಾಧನೆ ಮಾಡಿದರೂ ಮಾಧ್ಯಮಗಳಿಂದ ಚೆನ್ನಾಗಿ ಹಣ ಮಾಡಿತು ಎಂದು ಬಿಂಬಿಸಿಕೊಳ್ಳುವುದು ಮೊದಲ ವರಸೆ. ಎರಡನೇ ಚಿತ್ರ ಬೋಣಿಯಾಗದಿದ್ದರೂ ಒಂದಷ್ಟು ಅಭಿಮಾನಿಗಳನ್ನು ಚಿತ್ರ ಮಂದಿರದ ಬಳಿ ಕಲೆ ಹಾಕಿ ಮೂರು ದಿನಕ್ಕೆ ಎಷ್ಟೋ ಕೋಟಿ ಗಳಿಕೆ ಮಾಡಿತೆಂದು ಪತ್ರಿಕೆಗಳಲ್ಲಿ ಬರೆಸಿಕೊಳ್ಳುವುದು.. ಒಂದು ಚಿತ್ರ ಮೂರು ದಿನಗಳಲ್ಲಿ ಹತ್ತು ಕೋಟಿ ಗಳಿಕೆ ಮಾಡಿತೆಂದು ವಿಜೃಂಭಿಸುವುದು.. ಅದು ಅಥವಾ ಅದರಲ್ಲಿ ಅರ್ಧ ಭಾಗ ನಾಯಕ ನಟನ ಸಂಭಾವನೆ. ಹೀಗೆ ಹೆಚ್ಚುವ ಸಭಾವನೆ ನಾಲ್ಕನೇ ಚಿತ್ರ ಕ್ಕೆ ದುಪ್ಪಟ್ಟು ಆಗುತ್ತದೆ.. ಆದರೆ ಕೋಟಿ ಕೋಟಿ ಗಳಿಕೆ ಮಾಡಿದ ಚಿತ್ರದ ನಿರ್ಮಾಪಕ ಮಾತ್ರ ಯಾವ ರೀತಿಯಲ್ಲಿಯೂ ಸುಧಾರಿಸಿರುವುದಿಲ್ಲ.. ಕೆಲವು ಸ್ಟಾರ್ ಗಳನ್ನು ಹೊರತುಪಡಿಸಿದರೆ; ಅನೇಕರು ತಮ್ಮ ಪರವಾಗಿ ಬರೆಯುವ ದೊಡ್ಡ ಪಡೆಯನ್ನೇ ಜೊತೆಯಲ್ಲಿ ಇಟ್ಟು ಕೊಂಡಿರುತ್ತಾರೆ. ಇಂತಹವರಿಂದಲೇ ಒಬ್ಬ ಹೊಸ ನಟ ಸ್ಟಾರ್ ಆಗುತ್ತಾನೆ.. ಕ್ರಿಯಾಶೀಲತೆ ಗೊತ್ತಿಲ್ಲದಿದ್ದರೂ ಇನ್ನೊಬ್ಬ ಸ್ಟಾರ್ ನಿರ್ದೇಶಕ ಆಗುತ್ತಾನೆ.
