ಕಿರುಗೂರು ಗಯ್ಯಾಳಿಗಳು ಚಿತ್ರದಲ್ಲಿ ಹಳ್ಳಿಯನ್ನೇ ಹಿಡಿದು ಮುಕ್ಕುವಂತೆ ಗಲಾಟೆ ಮಾಡುವ ಹೆಣ್ಣು ಪಾತ್ರಗಳ ನಡುವೆ ಮಾತನ್ನೇ ಆಡದ ಸೈಲೆಂಟ್ ಪಾತ್ರವೊಂದಿದೆ. ಅದು ಕಣ್ಣುಗಳಲ್ಲೇ ಭಾವನೆಗಳನ್ನು ಹೊರ ಸೂಸುವ ಪಾತ್ರ. ಮೌನದಲ್ಲೇ ಕೊಲ್ಲುವುದು ಅಂತಾರಲ್ಲ.. ಆ ರೀತಿಯ ಪಾತ್ರ. ಚಿತ್ರಕ್ಕೊಂದು ತಿರುವು ಕೊಡುವುದು ಅದೇ ಪಾತ್ರ.
ನಾಗಿ ಹೆಸರಿನ ಆ ಪಾತ್ರದಲ್ಲಿ ಸಮರ್ಥ ಅಭಿನಯ ನೀಡಿದ್ದವರು ಸೋನುಗೌಡ. ಇಲ್ಲಿಯವರೆಗೂ ಅದೇ ರೀತಿಯ ಪಾತ್ರಗಳನ್ನೇ ಹೆಚ್ಚಾಗಿ ಮಾಡಿರುವ ಸೋನುಗೌಡ ನಿಜವಾದ ಕಲಾವಿದೆ. ಅಭಿನಯ ಸಾಮರ್ಥ್ಯಕ್ಕೆ ಹೆಚ್ಚು ಒತ್ತು ನೀಡುವ ಪಾತ್ರಗಳ ಆಯ್ಕೆಯಲ್ಲೇ ಒಲವು ತೋರುವ ಅವರಿಗೆ ಥಿಯೇಟರ್ ನತ್ತಲೇ ಹೆಚ್ಚು ಒಲವು.
ಮೇಕಪ್ ರಾಮಕೃಷ್ಣ ಅವರ ಪುತ್ರಿಯಾಗಿರುವ ಅವರಿಗೆ ಚಿತ್ರರಂಗದ ಒಲವು ಚಿಕ್ಕ ವಯಸ್ಸಿನಿಂದಲೇ ಇದ್ದರೂ ಓದು ಮುಗಿಯುವವರೆಗೆ ಇತ್ತ ಸುಳಿಯಲಿಲ್ಲ. ಬಳಿಕ ಮಾಡಿದ ಪಾತ್ರಗಳೆಲ್ಲವೂ ಜನರ ಮನಸ್ಸಿನಲ್ಲಿ ಉಳಿಯುವ ಪಾತ್ರಗಳೇ.
ಕಳೆದ ವರ್ಷ ತೆರೆಕಂಡ ಆರ್.ಚಂದ್ರು ನಿರ್ದೇಶನದ ‘ಐ ಲವ್ ಯು’ ಚಿತ್ರದಲ್ಲಿ ಮೌನದಲ್ಲಿ ಗಂಡನಿಗೆ ಅದಮ್ಯ ಪ್ರೀತಿ ಮೊಗೆದುಕೊಡುವ ಪತ್ನಿಯ ಪಾತ್ರದಲ್ಲಿ ಸೋನು ಅಭಿನಯ ಅನನ್ಯ. ನಾಯಕ ನಟಿಯ ಗ್ಲಾಮರ್ ಪಾತ್ರಕ್ಕಿಂತಲೂ ಈ ಸೈಲೆಂಟ್ ಪಾತ್ರವೇ ಪ್ರೇಕ್ಷಕರನಸ್ಸಿನಲ್ಲಿ ಹೆಚ್ಚು ಉಳಿಯುತ್ತದೆ.
ನನಗೆ ಅಭಿನಯ ಸಾಮರ್ಥ್ಯಕ್ಕೆ ಅನುಗುಣವಾದ ಪಾತ್ರಗಳು ಸಿಕ್ಕರೆ ಹೆಚ್ಚು ಖುಷಿಯಾಗುತ್ತದೆ. ಆದರೆ ಗ್ಲಾಮರ್ ಪಾತ್ರಗಳನ್ನು ಒಲ್ಲೆ ಎನ್ನಲಾರೆ. ಏಕೆಂದರೆ ಕಲಾವಿದೆಗೆ ಎಲ್ಲವೂ ಬೇಕು. ಸದ್ಯ ಕೊರೊನಾ ಹಿನ್ನೆಲೆಯಲ್ಲಿ ಚಿತ್ರರಂಗದ ಚಟುವಟಿಕೆ ನಿಧಾನಗತಿಯಲ್ಲಿದೆ. ಮುಂದೆ ಬರುವ ಅವಕಾಶಗಳನ್ನು ನಾನು ನಿರೀಕ್ಷೆ ಮಾಡುತ್ತಿರುವೆ ಎಂದು ನಕ್ಕರು ಸೋನುಗೌಡ.
