ರೇಟಿಂಗ್ : 3.5/5
ನಿರ್ಮಾಣ : ಪಾರ್ಥು
ನಿರ್ದೇಶನ : ಹರಿಪ್ರಸಾದ್‌ ಜಕ್ಕ
ಕಾಲದಲ್ಲಿ ಸಂಚರಿಸುವ ಭ್ರಮೆ ವಾಸ್ತವ..
ಇದು ಅಮ್ಮನನ್ನು ಕಳೆದುಕೊಂಡ ಮಗನೊಬ್ಬನ ಕನಸು ಕನವರಿಕೆ ಮಾತು ಮುಂದುವರಿಕೆ ಮತ್ತು ವಿಚಿತ್ರ ಭ್ರಮೆಯೊಳಗಿನ ಆಟ. ಟೈಮ್ ಟ್ರಾವೆಲ್ ನಲ್ಲಿ ಕ್ಷಣ ಕ್ಷಣವೂ ಕುತೂಹಲ.
ಭೂತ, ಭವಿಷ್ಯ ಮತ್ತು ವರ್ತಮಾನದ ಜೊತೆ ಭ್ರಮಾಧೀನ ಸ್ಥಿತಿಯಲ್ಲಿ ಸಂಚರಿಸುವುದು.. ಒಂದು ರೀತಿಯಲ್ಲಿ ಕಾಲ ಯಂತ್ರದ ಜೊತೆ ಹೋರಾಡುವುದು..
ಗಣ ಎಂಬ ಕೆಚ್ಚೆದೆಯ ಯುವಕ 1993ರ ಕಾಲಘಟ್ಟದ ಭೂತ ಮತ್ತು 2022ರ ವರ್ತಮಾನದ ಜೊತೆ ಬದುಕುತ್ತಾ ಕಂಡು ಹಿಡಿಯುವ ರಹಸ್ಯಗಳು ಕ್ಷಣ ಕ್ಷಣ ಥ್ರಿಲ್ ಗೆ ಒಳಪಡಿಸುತ್ತವೆ.
ಮನೆಯಲ್ಲಿನ ಟೆಲಿಫೋನ್ (ಲ್ಯಾಂಡ್ ಲೈನ್) ಮತ್ತದರ ವಾಸ್ತವದ ನೆರಳು ನಿಜವೋ ಕಲ್ಪನೆಯೋ ಎಂಬ ಭ್ರಮೆಯನ್ನೇ ಸೃಷ್ಟಿಸುತ್ತದೆ. ಅದರಲ್ಲಿ ಮಾತನಾಡುವಾಗ ಗತಿಸಿದ ಕಾಲಘಟ್ಟ ಎದುರು ನಿಲ್ಲುತ್ತದೆ.
ಚಲನೆಯ ನಿಯಮವನ್ನೇ ಅನುಸರಿಸಿ ಮಾಡಲಾಗಿರುವ ಕಥೆಯಲ್ಲಿ ಭೌತಶಾಸ್ತ್ರದ ಸೂತ್ರಗಳು ತಳುಕು ಹಾಕಿಕೊಂಡ ವಿಶೇಷಗಳು ಕಾಣುವುದು ಮತ್ತು ಪ್ರೇಕ್ಷಕನ ಐಕ್ಯೂ ಪರೀಕ್ಷೆಗೆ ಒಳಪಡಿಸುವುದು ರೋಮಾಂಚಕ ವಿಷಯವಾಗುತ್ತದೆ.
ಗಣನ ಸಾಕು ತಾಯಿ ಸುಜಾತ 25 ವರ್ಷಗಳ ಹಿಂದೆ ಸಾವಿಗೀಡಾದ ಕುತೂಹಲದ ವಿಷಯ ಪತ್ತೆ ಹಚ್ಚುವ ದಾರಿಯಲ್ಲಿ ವರ್ತಮಾನದಲ್ಲಿ ಆಕೆಯ ಜೊತೆಗಿದ್ದವರನ್ನು ಪತ್ತೆ ಹಚ್ಚುವ ಸವಾಲು ಚಿತ್ರದ ಕುತೂಹಲದ ಇನ್ನೊಂದು ಘಟ್ಟ.
ಎಚ್.ಜಿ.ವೇಲ್ಸ್ ಅವರ ಟೈಮ್ ಟ್ರಾವೆಲ್ ನ ಕಥೆ ಟೈಮ್ ಮಷಿನ್ ಹುಟ್ಟಿಸುವ ಅದೇ ಕುತೂಹಲ ಹುಟ್ಟಿಸುವಲ್ಲಿ ನಿರ್ದೇಶಕರು ಇಲ್ಲಿ ಸಫಲ. ಅದೇ ರೀತಿ ಭ್ರಮೆಯನ್ನೂ ಕಾಯ್ದುಕೊಂಡಿರುವುದು ಚಿತ್ರದ ಹೆಚ್ಚುಗಾರಿಕೆ.
ಬುದ್ದಿಗೆ ಕಸರತ್ತು ನೀಡುವ ಹಂಬಲ ಇರುವವರು ಖಂಡಿತಾ ಚಿತ್ರ ನೋಡಬಹುದು. ಏಕೆಂದರೆ ಕಾಲದ ಚಲನೆಯ ಜೊತೆ ಹಾಡು, ಸಾಹಸ ಮನರಂಜನೆಯನ್ನು ಸಮವಾಗಿ ಬೆಸೆಯಲಾಗಿದೆ.
ಇಂಟರ್ ನೆಟ್ ಯುಗದಲ್ಲಿ ಭೂತವನ್ನು ಅಗೆದು ತೆಗೆಯಬಹುದು. ವರ್ತಮಾನ ಥ್ರಿಲ್ ಆಗಬಹುದು. ಭೂತದಲ್ಲಿ ನಿಂತರೆ ಅದೇ ಭವಿಷ್ಯ ವಾಗಿ ಕಾಣುತ್ತದೆ. ಫಿಜಿಕ್ಸ್ ನ ಚಲನೆಯ ನಿಯಮಗಳ ಅರಿವಿದ್ದರೆ ಈ ಚಿತ್ರ ಇನ್ನೂ ಹೆಚ್ಚು ಥ್ರಿಲ್.
ಗಣ ಪಾತ್ರದಲ್ಲಿ ಪ್ರಜ್ವಲ್ ದೇವರಾಜ್ ಲೀಲಾಜಾಲವಾಗಿ ನಟಿಸಿದ್ದಾರೆ. ಸುಜಾತ ಪಾತ್ರದಲ್ಲಿ ವೇದಿಕಾ ಕುತೂಹಲದ ಅಂಶವಾಗಿದ್ದರೆ, ಶೃತಿಯಾಗಿ ಯಶ ಶಿವಕುಮಾರ್ ಮುದ್ದಾಗಿ ಕಾಣುತ್ತಾರೆ. ಶಿವರಾಜ್ ಕೆ.ಆರ್.ಪೇಟೆ, ರವಿ ಕಾಳೆ, ಸಂಪತ್,
ಕೃಷಿ ತಾಪಂಡ, ವಿಶಾಲ್ ಹೆಗಡೆ, ರಮೇಶ್ ಭಟ್ ಪಾತ್ರಗಳು ಗಮನ ಸೆಳೆಯುತ್ತವೆ.
ಅನೂಪ್ ಸೀಳಿನ್ ಸಂಗೀತ, ಜೈ ಆನಂದ್ ಛಾಯಾಗ್ರಹಣ, ಹರೀಶ್ ಕೊಮ್ಮೆ ಸಂಕಲನ , ಸತೀಶ್ ಎ ಕಲಾ ನಿರ್ದೇಶನ ಚಿತ್ರಕ್ಕೆ ಪೂರಕ.
