ಕೊರೊನಾ ಕಾರಣದಿಂದ ಕಳೆದ ನಾಲ್ಕು ವರ್ಷಗಳಿಂದ ಮುಂದೂಡುತ್ತಲೇ ಬಂದಿದ್ದ ಪ್ರತಿಷ್ಠಿತ ಬೆಂಗಳೂರು ಪ್ರೆಸ್ ಕ್ಲಬ್ ಗೆ ಅಂತೂ ಇಂತೂ ಚುನಾವಣೆ ನಡೆದು ಈಗ ಬದಲಾವಣೆ ಗಾಳಿ ಬೀಸುತ್ತಿದೆ..
ಭಾನುವಾರ (ಜೂನ್ 12) ನಡೆದ 2022-2023ನೇ ಸಾಲಿನ ಚುನಾವಣೆಯಲ್ಲಿ ಶ್ರೀಧರ್ ಅಧ್ಯಕ್ಷರಾಗಿ ಮತ್ತು ಬಿ.ಪಿ.ಮಲ್ಲಪ್ಪ ಪ್ರಧಾನ ಕಾರ್ಯದರ್ಶಿಯಾಗಿ ಭಾರೀ ಅಂತರದ ವಿಜಯ ಸಾಧಿಸಿದ್ದಾರೆ.
ಉಪಾಧ್ಯಕ್ಷರಾಗಿ ಆನಂದ ಬೈದನಮನೆ, ಕಾರ್ಯದರ್ಶಿಯಾಗಿ ದೊಡ್ಡ ಬೊಮ್ಮಯ್ಯ, ಜಂಟಿ ಕಾರ್ಯದರ್ಶಿಯಾಗಿ ಮಹಾಂತೇಶ್ ಎಸ್.ಹಿರೇಮಠ ಹಾಗೂ ಖಜಾಂಚಿಯಾಗಿ ಮೋಹನ್ ಕುಮಾರ್ ಬಿ.ಎನ್. ಆಯ್ಕೆಯಾಗಿದ್ದಾರೆ.
ಕಾರ್ಯಕಾರಿ ಸಮಿತಿ ಸದಸ್ಯರಾಗಿ ರೋಹಿಣಿ ಅಡಿಗ, ಜಿ.ಗಣೇಶ್, ಮುನಿರಾಮೇಗೌಡ (ರವಿ), ಆಲ್ಫ್ರೆಡ್ ಟೈನಿಸನ್, ಕೆ.ಎಸ್.ಸೋಮಶೇಖರ್, ಯಾಸಿರ್ ಮುಷ್ತಾಕ್ ಹಾಗೂ ಮಿನಿ ತೇಜಸ್ವಿನಿ ಆಯ್ಕೆಯಾಗಿದ್ದಾರೆ.
ಈ ಬಾರಿಯ ಚುನಾವಣಾ ಕಣ ಹಿಂದೆಂದಿಗಿಂತಲೂ ಹೆಚ್ಚು ರಂಗೇರಿತ್ತು. ಅಭ್ಯರ್ಥಿಗಳ ಸಂಖ್ಯೆ ಕೂಡ ಹೆಚ್ಚಾಗಿತ್ತು ಮತ್ತು ಭಾಗವಹಿಸಿದ ಸದಸ್ಯರ ಪ್ರತಿಕ್ರಿಯೆ ಕೂಡ ಸಂಭ್ರಮಿಸಿದ ಭಾವದಲ್ಲಿತ್ತು.
ಭಾನುವಾರ ನಿಜಕ್ಕೂ ಪ್ರೆಸ್ ಕ್ಲಬ್ ಹಬ್ಬವಾಗಿಯೇ ಗೋಚರಿಸಿತು. ನಿಕಟಪೂರ್ವ ಅಧ್ಯಕ್ಷರಾದ ಸದಾಶಿವ ಶೆಣೈ, ಪ್ರಧಾನ ಕಾರ್ಯದರ್ಶಿ ಕಿರಣ್ ಹಾಗೂ ಇತರರು ಸಂಭ್ರಮದಲ್ಲಿ ಓಡಾಡುತ್ತಿದ್ದರು.
ಈ ಬಾರಿ ವೈಶಿಷ್ಟ್ಯ ಎಂದರೆ ಮಹಿಳಾ ಪ್ರಾತಿನಿಧ್ಯದ ಸಲುವಾಗಿ ಮಹಿಳೆಯರೇ ಓಡಾಟ ನಡೆಸಿದ್ದು, ಆ ಮೂಲಕ ರೋಹಿಣಿ ಅಡಿಗ ಹಾಗೂ ಮಿನಿ ತೇಜಸ್ವಿನಿ ಅವರನ್ನು ಗೆಲ್ಲಿಸಿಕೊಂಡಿದ್ದು..
ವಿಜಯಮ್ಮ, ಶಾಂತಲಾ ಧರ್ಮರಾಜ್, ಕೆ.ಎಚ್.ಸಾವಿತ್ರಿ, ಪ್ರತಿಭಾ ನಂದಕುಮಾರ್, ಮೊದಲಾದವರು ಪ್ರಮುಖವಾಗಿ ಕಾಣಿಸಿಕೊಂಡರು.
