ರೇಟಿಂಗ್ : 3.5/5
ನಿರ್ಮಾಣ : ದಯಾಳ್ ಪದ್ಮನಾಭನ್
ನಿರ್ದೇಶನ : ರವಿಕಿರಣ್ ಹಾಗೂ ಚೇತನ್ ಎಸ್ ಪಿ.
ಡಾರ್ಕ್ ವೆಬ್ ಕರಾಳ ಮುಖ ದರ್ಶನ..
ಫ್ಯಾಷನ್ ಡಿಸೈನರ್ ಪ್ರಿಯಾ ಕುಟುಂಬದ ಒಂದು ದುರ್ಘಟನೆಯಿಂದ ಇಡೀ ಮನೆ ವಿಡಿಯೋ ಕಣ್ಗಾವಲಿನ ಚೌಕಟ್ಟಿಗೆ ಒಳಪಡುತ್ತದೆ. ಆ ಮೂಲಕ ಕಪಟಿಯ ವಂಚನೆಯ ಜಾಲದ ಕರಾಳ ಮುಖ ಗೋಚರಿಸುತ್ತಾ ಹೋಗುತ್ತದೆ..
ಈ ಮೋಸ ವಂಚನೆಯ ಜಗತ್ತು ತನ್ನ ಕಬಂಧ ಬಾಹುಗಳಿಂದ ದುರ್ಬಲ ಮನಸ್ಸುಗಳನ್ನು ಆಕ್ರಮಿಸಿ ಸಂಭ್ರಮಿಸುತ್ತದೆ..
ಅತಿಯಾದ ಆಸೆ ಮತ್ತು ಮತ್ತೇರಿಸುವ ಹಿಂಸೆಯ ರೀತಿಯ ವಿಕೃತಿಗಳಿಂದ ಮಾಡಬಾರದ ಅನಾಹುತ ಮಾಡುವ ಕಪಟ ಮನಸ್ಸಿನ ಸಂಚು ಕ್ಷಣ ಕ್ಷಣವೂ ಬೆಚ್ಚಿ ಬೀಳಿಸುತ್ತದೆ..
ಸೈಬರ್ ತಾಣಗಳ ಮೂಲಕ ವಿಕೃತಿ ಮೆರೆಯುವ ಜಾಲಗಳ ಹೊಸ ಹೊಸ ಆಯಾಮಗಳ ಬಗ್ಗೆ ಸಭ್ಯ ನಾಗರಿಕ ಪ್ರಪ್ರಂಚಕ್ಕೆ ಹೆಚ್ಚಾಗಿ ಏನು ತಿಳಿಯದೇನಲ್ಲ; ಈಚೆಗೆ ಕೇಂದ್ರ ಗೃಹ ಸಚಿವಾಲಯ ಎಚ್ಚರಿಕೆ ಗಂಟೆಯನ್ನು ಮೊಬೈಲ್ ರಿಂಗ್ ಟೋನ್ ಗಳ ಮೂಲಕ ಬಿತ್ತರಿಸುತ್ತಿದೆ ಎಂಬುದು ಇಲ್ಲಿ ಉಲ್ಲೇಖಾರ್ಹ.
ಈ ಕಥೆಯಲ್ಲಿ ಸುಮನ್ ಎಂಬ ಮೆಡಿಕಲ್ ವಿದ್ಯಾರ್ಥಿ ಹಾಗೂ ಚಕ್ರಿ ಎಂಬ ಕ್ಯಾಬ್ ಡ್ರೈವರ್ ಹೂಡುವ ಆಟದಲ್ಲಿ ಪ್ರಿಯಾ ಮನೆ ಕಣ್ಗಾವಲಿಗೆ ಒಳಪಡುತ್ತದೆ. ಇಬ್ಬರ ಉದ್ದೇಶವೂ ಒಂದೇ ವಂಚನೆಯ ಮೂಲಕ ಹಣ ಗಳಿಸುವುದು..
ಇವರಿಬ್ಬರಲ್ಲಿ ಚಕ್ರಿ ಅತ್ಯಂತ ದುಷ್ಟ ಮತ್ತು ಕ್ರೂರಿ. ಆತನ ವರಸೆಗಳು ಭಯಾನಕ. ಅಬ್ಬಾ ಈ ಸೈಬರ್ ವಂಚನೆಯಲ್ಲಿ ಇಷ್ಟೊಂದು ಕ್ರೌರ್ಯವಿದೆಯೇ ಎಂದು ಆತ್ಮ ವಿಮರ್ಶೆ ಮಾಡಿಕೊಳ್ಳುವಷ್ಟು ಭಯಾನಕ.
ಪ್ರಿಯಾ ಮನೆಯಲ್ಲಿಯೇ ಆಕೆಯನ್ನು ಹಿಂಸೆಗೆ ಒಳಪಡಿಸುವ ಸಂಚು ನಡೆಯುವುದು ಮತ್ತು ಕ್ರೂರ ಮನಸಿನ ಆ ಆಟ ಕೌತುಕ ಮತ್ತು ಭಯಾನಕ.
ಪ್ರಿಯಾ ತನ್ನ ತಮ್ಮ ಅಮಿತ್ ಬದುಕಿನ ಬಗ್ಗೆ ಕನಸುಗಳನ್ನು ಕಟ್ಟಿಕೊಂಡವಳು.. ನಂತರ ಆತನ ಸ್ಥಿತಿಗೆ ಶೋಕಿಸುತ್ತಾ ಕಾಲ ಕಳೆಯುತ್ತಿದ್ದವಳಿಗೆ ಈ ಸೈಬರ್ ವಂಚನೆಯ ಸೈಕ್ ಗಳು ಹೇಗೆ ವರವಾದರು ಎಂಬುದು ಚಿತ್ರ ನೋಡಿಯೇ ತಿಳಿಯಬೇಕು.
ಪ್ರಿಯಾ ಪಾತ್ರದಲ್ಲಿ ಸುಕೃತಾ ವಾಗ್ಲೆ ಹಾಗೂ ಸೈಬರ್ ವಂಚನೆಯ ಸೂತ್ರಧಾರ ದೇವ್ ದೇವಯ್ಯ ಹಾಗೂ ಸೈಕ್ ಆಗಿ ಕಾಣುವ ಸಾತ್ವಿಕ್ ಕೃಷ್ಣನ್ ನಟನೆ ಗಮನಾರ್ಹ.
ಆನ್‌ಲೈನ್ ಶೋಷಣೆಯ ಪರಿಣಾಮಗಳು ಮತ್ತು ಆಧುನಿಕ ತಂತ್ರಜ್ಞಾನವನ್ನು ಬಳಸಿಕೊಂಡು ಜನರಿಗೆ ಹೇಗೆ ಮೋಸ ಮಾಡಲಾಗುತ್ತಿದೆ ಎಂಬುದರ ದರ್ಶನವಾಗುವುದರಿಂದ ಇದು ಇವತ್ತಿನ ಜನ ಸಾಮಾನ್ಯರ ಕಥೆ ಎನಿಸುತ್ತದೆ.
