ಚಿತ್ರಗಳನ್ನು ನೋಡಲು ಹೋದವರಿಗೆ ಮಧ್ಯಂತರ ವಿರಾಮ ಸಿಗುತ್ತದೆ ಎಂಬುದು ಸಾಮಾನ್ಯ. ಆದರೆ ಬದುಕಿನಲ್ಲಿಯೂ ಒಮ್ಮೆ ಇದು ಬರುತ್ತದೆ ಎಂಬುದನ್ನು ಚಿತ್ರತಂಡವೊಂದು ಸಾರಲು ಹೊರಟಿದೆ.
ಮೂವರು ಗ್ರಾಮೀಣ ಭಾಗದ ಹುಡುಗರ ತುಂಟಾಟ ಸಾರುವ ಚಿತ್ರವೊಂದು ಈ ವಾರ (ಮಾ.7)ಬಿಡುಗಡೆಗೆ ಸಜ್ಜಾಗಿದ್ದು, ಆ ಚಿತ್ರದ ಹೆಸರೇ ಇಂಟರ್ ವಲ್.
ಭರತವಷ್೯ ಪಿಚ್ಚರ್ಸ್ ಅಡಿ, ಸುಖೀ ಹಾಗೂ ಭರತ್ ಸೇರಿ ನಿರ್ಮಿಸಿರುವ ಹಾಗೂ ಭರತ್ ನಿರ್ದೇಶಿಸಿರುವ ಚಿತ್ರ ದಲ್ಲಿ ಯುವ ಸಮೂಹ ಆಕರ್ಷಿಸುವ ಎಲ್ಲಾ ಅಂಶಗಳಿವೆ.
ಶಶಿರಾಜ್ ಮುಖ್ಯ ಪಾತ್ರದಲ್ಲಿರುವ ಈ ಚಿತ್ರದಲ್ಲಿ ಪ್ರಜ್ವಲ್ ಕುಮಾರ್ ಗೌಡ, ಸುಕಿ, ಚರಿತ್ರ ರಾವ್, ಸಹನ ಆರಾಧ್ಯ, ಸಮೀಕ್ಷ, ದಾನಂ ಇತರರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
ಇಂದಿನ ಯುವ ಹೃದಯಗಳು ಪ್ರೀತಿ ಪ್ರೇಮದ ಸುತ್ತ ಹೇಗೆಲ್ಲಾ ವರ್ತಿಸುತ್ತವೆ ಎಂಬುದರ ಸುತ್ತ ನಡೆಯುವ ಕಥೆಯಲ್ಲಿ ಪ್ರೇಕ್ಷಕರಲ್ಲಿ ನಗೆಯ ಬುಗ್ಗೆಯನ್ನೇ ಹರಿಸುವ ಅಂಶಗಳಿವೆ.
ಗಮನ ಸೆಳೆಯುವ ಕ್ಲೈಮ್ಯಾಕ್ಸ್ ಚಿತ್ರದ ಪ್ರಮುಖ ಅಂಶ ಎಂಬುದು ಚಿತ್ರತಂಡದ ಮಾತು. ವಿಕಾಸ್ ವಸಿಷ್ಠ ಸಂಗೀತ ಸಂಯೋಜನೆ ಮಾಡಿರುವ ಹಾಡುಗಳಿಗೆ ವಿಜಯ್ ಪ್ರಕಾಶ್, ಚಂದನ್ ಶಟ್ಟಿ, ಆಲ್ ಓಕೆ ಅಲೋಕ್, ಸುನಿಧಿ ಗಣೇಶ್, ವಾಣಿ ಹರಿಕೃಷ್ಣ ದನಿಯಾಗಿದ್ದಾರೆ.
ಕಥೆ, ಚಿತ್ರಕಥೆ, ಸಂಭಾಷಣೆಯನ್ನು ಸುಕೇಶ್ ಬರೆದಿದ್ದು, ರಾಜ್ ಕಾಂತ್ ಛಾಯಾಗ್ರಹಣ, ಚಂದ್ರು ಬಂಡೆ ಸಾಹಸ, ಶಶಿಧರ್ ಸಂಕಲನ ಈ ಚಿತ್ರಕ್ಕಿದೆ.
ಬೆಂಗಳೂರು, ಶಿವಮೊಗ್ಗ, ತೀರ್ಥಹಳ್ಳಿ ಸುತ್ತಮುತ್ತ ಈ ಚಿತ್ರದ ಚಿತ್ರೀಕರಣ ನಡೆಸಲಾಗಿದ್ದು, ಇದೇ ವಾರ ‘ಇಂಟಲ್ ವಲ್’ನ ಮನರಂಜನೆ ಚಿತ್ರಮಂದಿರಗಳಲ್ಲಿ ಸಿಗಲಿದೆ.
