ರೇಟಿಂಗ್ : 3.5/5
ನಿರ್ಮಾಣ : ಪಿ.ಬಿ.ಪ್ರೇಮ್ ನಾಥ್
ನಿರ್ದೇಶನ : ರೋಹಿತ್ ಕೀರ್ತಿ
ಆಸೆಗಳು ಹಕ್ಕಿಗಳಾದಾಗ..
ಮನುಷ್ಯನಿಗೆ ಹಕ್ಕಿಯಂತೆ ಹಾರುವ ಇಚ್ಚೆ ಪ್ರಬಲವಾದಾಗ ಇಲ್ಲದ ಸಾಹಸಗಳಿಗೆ ಪ್ರೇರೇಪಿಸುತ್ತದೆ. ಕೆಲವೊಮ್ಮೆ ಮನೆಯೆಂಬ ನರಕವೇ ಹೊರ ಜಗತ್ತಿಗೆ ದೂಡುತ್ತದೆ.
ಇಲ್ಲಿನ ಕಥಾ ನಾಯಕಿ ಪಾರ್ವತಿಗೆ ಮನೆಯ ನರಕ ಮತ್ತು ಹತ್ತಿಕ್ಕಿದ ಆಸೆಗಳ ಫಲವಾಗಿ ಸಾಹಸಕ್ಕೆ ತೆರೆದುಕೊಳ್ಳುವ ಮನಸ್ಸಾಗುತ್ತದೆ. ಆಗ ಆಕೆಗೆ ಸಹಕರಿಸುವುದು ಪಾಯಲ್ ಅಲಿಯಾಸ್ ಪಾರು ಎಂಬ ಸಾಹಸಿ ಹುಡುಗಿ.
ವಯಸ್ಸು ಆಯುಷ್ಯದ ಅರ್ಧ ದಾಟಿದೆ ಎಂಬಂತಹ ಸ್ಥಿತಿಯಲ್ಲಿ ಕಾಯಿಲೆಗಳು ಅರ್ಧ ಮುಕ್ಕುತ್ತವೆ. ಮನೆಯಲ್ಲಿ ಬೆಲೆ ಇಲ್ಲ. ಪ್ರೀತಿಯಂತೂ ಮೊದಲೇ ಇಲ್ಲ. ಹೀಗೆ ಪ್ರೀತಿ ವಂಚಿತ ಬದುಕು ಬದುಕುವ ಆಸೆಯನ್ನೇ ನಿರಾಕರಿಸುತ್ತದೆ.
ಆದರೆ ಇಲ್ಲಿ ಪಯಣವೆಂಬ ಸಾಹಸಕ್ಕೆ ತೆರೆದುಕೊಳ್ಳುತ್ತದೆ. ಪಾರು ಮತ್ತು ಪಾರ್ವತಿ ಇಬ್ಬರ ಸುದೀರ್ಘ ಪಯಣದ ಕಥೆಯಲ್ಲಿ ಕಾಣುವುದು ಕಣ್ಣು ಹಾಯಿಸಿದಷ್ಟು ಭೂಗೋಳದ ವಿಹಂಗಮ ಹೊರ ನೋಟದ ಸೌಂದರ್ಯ.
ಪಾರ್ವತಿ 60 ವರ್ಷ ದಾಟಿದ ಚಿರ ಯೌವನಿಗ ಹೆಣ್ಣು. ಆದರೆ ಯೌವನದಲ್ಲಿ ಸಾಧ್ಯವಾಗದ ಹೊರ ಸಾಹಸಗಳನ್ನು ಈಗ ಮಾಡುವಾಸೆ. ಪಾರು ವಿಶಾಲ ಮನಸ್ಸಿನವಳು. ಈ ಇಬ್ಬರ ಜರ್ನಿಯಲ್ಲಿ ಮಾತಿಗಿಂತ ಪ್ರಕೃತಿ ಸೌಂದರ್ಯವೇ ಹೆಚ್ಚು ಗಮನ ಸೆಳೆಯುವುದು ವಿಶೇಷ.
ಕಾರು ಮತ್ತು ಅದರ ಮೇಲೊಂದು ಬುಲೆಟ್ ಬೈಕ್. ಈ ಇಬ್ಬರ ಪಯಣ. ಜೀವನದ ನಶ್ವರತೆ ಕಾಣದಂತೆ ಸಾಗುವ ಜೀವನ ಪ್ರೀತಿ. ಕೆಲವೊಮ್ಮೆ ತರ್ಕಕ್ಕೆ ಸಿಗದ ಉಲ್ಲಾಸ ನಡವಳಿಕೆ.
ಪಯಣದಲ್ಲೇ ಮುಗಿದು ಹೋಗುವ ಕಥೆಯಲ್ಲಿ ಭಾವನಾತ್ಮಕ ಅಂಶಗಳು ಕಂಡೂ ಕಾಣದಂತೆ.. ಏಕೆಂದರೆ ಅದಮ್ಯ ಜೀವನ ದರ್ಶನದ ಬದಲು ಕೆಲವೊಮ್ಮೆ ಇಣುಕುವ ಕೃತಕತೆ.
ಒಂಟಿ ಮಹಿಳೆಗೆ ಮಾರಕ ರೋಗ ಆವರಿಸಿದೆ ಎಂಬುದು ಪ್ರಜ್ಞೆಯಲ್ಲಿ ಇಲ್ಲ. ಅದು ಜೊತೆಗಿರುವ ಪಾರುಗೆ ತಿಳಿದಾಗ ಆಕೆ ತೋರುವ ಔದಾರ್ಯ ಗಮನಾರ್ಹ. ಮನೆ ಮಂದಿಯ ಕೃತಕ ಪ್ರೀತಿಯಲ್ಲಿ ನರಳುವ ಬದಲು ವಿಹಾರ ಹೊರಡುವ ಪಾರ್ವತಿಗೆ ಅದಮ್ಯ ಜೀವನ ಪ್ರೇಮದ ಆಸೆಗಳು ಮೈದಳೆಯುವ ಪ್ರತಿ ಕ್ಷಣವನ್ನು ತೆರೆಯ ಮೇಲೆ ಮೂಡಿಸಿದ್ದಾರೆ ನಿರ್ದೇಶಕರು.
ದೀಪಿಕಾ ದಾಸ್, ಪೂನಂ ಸರ್ ನಾಯಕ್ ಹಾಗೂ ಫವಾಜ್ ಅಶ್ರಫ್ ಅವರು ಪ್ರಮುಖಪಾತ್ರದಲ್ಲಿ ನಟಿಸಿರುವ ಚಿತ್ರದಲ್ಲಿ ಕಾರು ಕೂಡ ಪ್ರಮುಖ ಪಾತ್ರಧಾರಿ.
ದೀಪಿಕಾ ದಾಸ್ ಲೀಲಾಜಾಲವಾಗಿ ನಟಿಸಿದ್ದಾರೆ. ಪೂನಂ ಅವರಿಗೆ ಸುಧಾರಾಣಿ ಅವರ ಧ್ವನಿ ಇರುವುದೇ ವಿಶೇಷ.
ಅಬಿನ್ ರಾಜೇಶ್ ಛಾಯಾಗ್ರಹಣದಲ್ಲಿ ಊರು ಕೇರಿ ಸುಂದರ. ಆರ್ ಹರಿ ಸಂಗೀತ ಹಾಗೂ ಸಿ.ಕೆ.ಕುಮಾರ ಸಂಕಲನ ಚಿತ್ರಕ್ಕೆ ಪೂರಕ.
