Uncategorized

ದೇಶಭಕ್ತಿ ಭಾವುಕ ಅಭಿವ್ಯಕ್ತಿ

ಭಾರತೀಯ ಸೈನ್ಯದಲ್ಲಿ ದುಡಿಯುವ ಪ್ರತಿಯೊಬ್ಬ ಯೋಧನಲ್ಲಿ ದೇಶಭಕ್ತಿ ಇಡೀ ಮೈಮನ ಆವರಿಸಿರುತ್ತದೆ.. ದೇಶಕ್ಕಾಗಿ ದುಡಿಯುವಾಗ ಖಾಸಗಿ ಬದುಕು ಅನೇಕ ಕಷ್ಟ ಕೋಟಲೆಗಳಿಂದ ನರಳುತ್ತದೆ. ಕಾಶ್ಮೀರದಲ್ಲಿ ಆರ್ಟಿಕಲ್ 370 ತೆಗೆಯುವ ಮುನ್ನ ಅಲ್ಲಿನ ಜನರು ಎದುರಿಸುತ್ತಿದ್ದ ದುರ್ಬರ ಬದುಕು
ಕಾಣ ಸಿಗುತ್ತದೆ..

ಹೀಗೆ ಸಾಕಷ್ಟು ವಿಷಯಗಳ ಸುತ್ತ ಕಥೆ ಹೆಣೆಯಲಾಗಿರುವ ‘ವಿಧಿ 370’ಯಲ್ಲಿ ಕಾಣುವುದು ಯಥೇಚ್ಛ ದೇಶಭಕ್ತಿ ಮತ್ತು ಮುಗ್ಧ ಜನರ ನರಕ ಸದೃಶ ಬದುಕು..

ಹಳ್ಳಿಯಿಂದ ದಿಲ್ಲಿವರೆಗೆ ಎಂಬಂತೆ ಕರ್ನಾಟಕದಿಂದ ಕಾಶ್ಮೀರದವರೆಗೆ ಅಮಾಯಕರ ಬದುಕು ಮತ್ತು ದುಷ್ಕೃತ್ಯ ನಡೆಸುವ ವಿಚ್ಛಿದ್ರಕಾರಕ ಶಕ್ತಿಗಳ ಅಟ್ಟಹಾಸದ ಚಿತ್ರಣ ಇರುವ ಚಿತ್ರದ ಪ್ರತಿ ನೆಲೆಯಲ್ಲಿ ಕಾಣುವುದು ದೇಶ ಭಕ್ತಿಯೇ.

ಕೇವಲ ಒಂದು ವಿಷಯದ ಸುತ್ತ ಕೇಂದ್ರೀಕೃತವಾಗದ ಕಥೆಯಲ್ಲಿ ಬಂದು ಹೋಗುವ ಪಾತ್ರಗಳಿಗೆ ಲೆಕ್ಕವೇ ಇಲ್ಲ; ಹಾಗೆಯೇ ವಿಷಯಾಂತರವಾಗುವ ಸನ್ನಿವೇಶಗಳೂ ಅಷ್ಟೇ.

ನಿರ್ದೇಶಕ ಕೆ.ಶಂಕರ್ ಭಾರೀ ಎನಿಸುವ ವಿಷಯವನ್ನು ಗಂಭೀರವಾಗಿ ಹೇಳಲು ಹೋಗಿಲ್ಲ; ಬದಲಿಗೆ ಅತ್ತ ಇತ್ತ ಸುತ್ತ ಮುತ್ತ‌ ಎಂಬಂತೆ ಗಮನ ಹರಿಸುವುದರಿಂದ ಅವರು ನಿಜಕ್ಕೂ ಏನು ಹೇಳ ಹೊರಟಿದ್ದಾರೆ ಎಂಬುದು ಪ್ರಶ್ನೆಯಾಗುತ್ತದೆ.

ಆದರೆ ಕಾಶ್ಮೀರದ ಕ್ರೌರ್ಯದ ಒಂದು ಮುಖವನ್ನು ಅನಾವರಣ ಮಾಡುವುದರಿಂದ ಪ್ರೇಕ್ಷಕ ಆಸಕ್ತಿಯಿಂದ ಕುತೂಹಲ ಕಾಯ್ದುಕೊಳ್ಳುವುದು ಸಾಧ್ಯವಾಗಿದೆ. ಉಗ್ರಗಾಮಿ ಚಟುವಟಿಕೆ ನಡೆಯುವ ಸನ್ನಿವೇಶಗಳಲ್ಲಿ ಹಿಂದಿ ಭಾಷೆ ಯಥೇಚ್ಛ ಬಳಕೆಯಾಗಿದೆ.

ಮುಖ್ಯ ಪಾತ್ರದಲ್ಲಿರುವ ಶಶಿಕುಮಾರ್ ಅವರ ಹೀರೋಯಿಸಂ ಇಲ್ಲಿ ಕಾಣುವುದಿಲ್ಲ; ಶೃತಿ ಅವರಿಗೆ ಗಂಭೀರ ಕಾಯಿಲೆ ಇದ್ದರೂ ಅದು ವ್ಯಕ್ತವಾಗುವುದಿಲ್ಲ. ಗಣೇಶ್ ರಾವ್, ದೊಡ್ಡ ರಂಗೇಗೌಡ, ಯತಿರಾಜ್, ದಿವಂಗತ ಶಿವರಾಮ್ ಹಾಗೂ ಲಕ್ಷ್ಮಣ್ ಅವರ ಪಾತ್ರಗಳು ಎದ್ದು ಕಾಣುತ್ತದೆ. ನಿರ್ಮಾಪಕ ಸಿ.ರಮೇಶ್ ಕೂಡ ಒಂದು ಪಾತ್ರ ನಿರ್ವಹಿಸಿರುವುದು ವಿಶೇಷ.

ವಿನು ಮನಸ್ಸು ಹಿನ್ನೆಲೆ ಸಂಗೀತ ಚಿತ್ರದ ಹೈಲೈಟ್.

ತೇಜಸ್ ಕ್ರಿಯೇಷನ್ಸ್ ಮೂಲಕ ಚಿತ್ರಗಳನ್ನು ನಿರ್ಮಾಣ ಮಾಡುತ್ತಿರುವ ಚಂದ್ರಶೇಖರ್ ತಮ್ಮ ಪುತ್ರ ಅಭಯ್ ಗಾಗಿ ಎರಡನೇ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದು, ಆ ಚಿತ್ರಕ್ಕೆ ‘ಮಂಡ್ಯ ಹೈದ’ ಎಂಬ ಹೆಸರಿಡಲಾಗಿದೆ.

ಈಚೆಗೆ ಅಭಯ್ ಹುಟ್ಟುಹಬ್ಬದ ಸಂದರ್ಭದಲ್ಲಿ ಚಿತ್ರದ ಫಸ್ಟ್ ಲುಕ್ ಮತ್ತು ಶೀರ್ಷಿಕೆ ಬಿಡುಗಡೆ ಸಮಾರಂಭದಲ್ಲಿ ಚಿತ್ರತಂಡ ಅತ್ಯಂತ ಉತ್ಸಾಹದಿಂದ ಪಾಲ್ಗೊಂಡಿತ್ತು.

ಮಂಡ್ಯ ಹೈದ ಚಿತ್ರವು ತೇಜಸ್ ಕ್ರಿಯೇಷನ್ಸ್ ನ ಐದನೇ ಚಿತ್ರ ಹಾಗೂ ಅಭಯ್ ಚಂದ್ರಶೇಖರ್ ಎರಡನೇ ಚಿತ್ರವಾಗಿತ್ತು. ಈ ಮುಂಚೆ ‘ಮನಸಾಗಿದೆ’ ಎಂಬ ಚಿತ್ರವನ್ನು ಮಗನಿಗಾಗಿ ಚಂದ್ರಶೇಖರ್ ಮಾಡಿದ್ದರು.

ಹಿಂದೆ ರಾಘಣ್ಣ ಅಭಿನಯದ ‘ವಾರ್ಡ್ ನಂ.11’ ಎಂಬ ಚಿತ್ರವನ್ನು ನಿರ್ದೇಶನ ಮಾಡಿದ್ದ ವಿ. ಶ್ರೀಕಾಂತ್ ಕಥೆ, ಚಿತ್ರಕಥೆ ಬರೆದು ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದಾರೆ. ಇದೇ ತಿಂಗಳ 18 ರಂದು ಬಂಡೆ ಮಾಂಕಾಳಮ್ಮ ದೇವಸ್ಥಾನದಲ್ಲಿ ಈ ಚಿತ್ರದ ಮುಹೂರ್ತ ನಡೆಯಲಿದೆ ಎಂಬ ಮಾಹಿತಿಗಳನ್ನು ನೀಡಿತು ಚಿತ್ರತಂಡ.

ಅಭಯ್ ಎದುರು ಕಿರುತೆರೆ ನಟಿ ಭೂಮಿಕಾ ನಟಿಸುತ್ತಿದ್ದು, ಪ್ರೀತಿ ಪ್ರೇಮದ ಕಥಾ ಹಂದರವಿರುವ ಈ ಚಿತ್ರಕ್ಕೆ ಶೇ.80ರಷ್ಟು ಚಿತ್ರೀಕರಣ ಮಂಡ್ಯ ಹಾಗೂ ಅದರ ಸುತ್ತಮುತ್ತಲಿನ ಪ್ರದೇಶದಲ್ಲಿ ನಡೆಯಲಿದೆ. ‌ಮನುಗೌಡ ಛಾಯಾಗ್ರಹಣ, ಸುರೇಂದ್ರನಾಥ್ ಸಂಗೀತ ಚಿತ್ರಕ್ಕಿದೆ.

ಅದಮ್ಯ ಸಾಹಸಿಗನ ವಿನಮ್ರ ಛಲ
ಕ್ಲಾಸಿಕ್ ಮಾದರಿ ವಿಜಯದ ಸಂಕೇತ

ಅದಮ್ಯ ಸಾಹಸದ ಉತ್ಸಾಹ ಮೈದಳೆಯುವುದು ಯೌವನ ಕಾಲದಲ್ಲಿ..

ಮುಂಬೈನಿಂದ ಗದಗ ರೈಲು ನಿಲ್ದಾಣಕ್ಕೆ ಬಂದಿಳಿಯುವ ದಪ್ಪ‌ ಮೀಸೆಯ ದಷ್ಟ ಪುಷ್ಟ ದೇಹದ ಯುವಕ ಬ್ಯಾಂಡ್ ಬಜಾಯಿಗೆ ಹೆಜ್ಜೆ ಹಾಕುವಾಗ ಕಾಣುವುದು ಹುಚ್ಚು ಸಾಹಸಗಳ ಮೂರ್ತ ರೂಪವೇ..

ಅತ್ಯಂತ ವೇಗದ ಮುದ್ರಣ ಯಂತ್ರ ತಂದಿಡುವ ಆ ಯುವಕನ ವೇಗ ಅದನ್ನೂ ಮೀರಿದ್ದು.. ಎತ್ತರಕ್ಕೆ ಬೆಳೆಯುವ ಆಕಾಂಕ್ಷೆ ಎದ್ದು ಕಾಣುತ್ತದೆ..

ಗದಗ ಎಂಬ ಮಣ್ಣಿನ ರೂಪವನ್ನೇ ಹೊತ್ತ ಊರಿನಲ್ಲಿ ಬಿ.ಜಿ.ಸಂಕೇಶ್ವರ ಅಂಡ್ ಕೋ.. ಎಂಬ ಮುದ್ರಣ ಸಂಸ್ಥೆ ಅತ್ಯಂತ ‌ಜನಪ್ರಿಯ ಮತ್ತು ಜನತೆಯ ಉಸಿರಿನಲ್ಲಿ ಬೆರೆತ ಪುಸ್ತಕ ಸಂಸ್ಕೃತಿಯ ಹೆಗ್ಗಳಿಕೆ.

ಅದರ ಮಾಲೀಕರಾದ ಸಂಕೇಶ್ವರ ಸರಳತೆಯ ಸಾಕಾರ ಮೂರ್ತಿ. ಊರಿನ ಜನರಲ್ಲಿ ಗೌರವಸ್ಥ ಮತ್ತು ಆದರ್ಶದ ವ್ಯಕ್ತಿ. ಅವರ ಮಗನೇ ಈ ವಿಜಯ್. ಅಪ್ಪನ ನೆರಳು ಬಹಳ ಸಮಯ ಬೇಡವೆಂದು ಹೊರಬಂದು ಟ್ರಾನ್ಸ್ ಪೋರ್ಟ್ ಉದ್ಯಮ ಸ್ಥಾಪಿಸಿದ ಗಟ್ಟಿಗ..

ಆದರೆ ಅದು ಕಠಿಣವಾದ ಹಾದಿ. ಕಲ್ಲು ಮುಳ್ಳುಗಳೇ‌ ಹೆಚ್ಚು. ಆದರೂ ತಾಳ್ಮೆಗೆಡದೆ ಮುನ್ನಡೆದ ವಿಜಯ್ ಅಲಿಯಾಸ್ ವಿಜಯ್ ಸಂಕೇಶ್ವರ ಕಟ್ಟಿದ್ದು ಬೃಹತ್ ಸಾಮ್ರಾಜ್ಯ.

ಅತ್ಯಂತ ಬುದ್ಧಿಮತ್ತೆ ಮತ್ತು ವ್ಯಾವಹಾರಿಕ ಗುಣಗಳ ಗಣಿಯಾಗಿದ್ದ ವಿಜಯ್ ಒಂದು ಲಾರಿಯಿಂದ ಆರಂಭಿಸಲಾದ ಉದ್ಯಮ ವಿ.ಆರ್.ಎಲ್ ಸಂಸ್ಥೆ. ಅದು ಬೃಹದಾಕಾರವಾಗಿ ಬೆಳೆದು ನಾಡಿನ ಹೆಮ್ಮೆಯ ಸಂಸ್ಥೆ ಆಗುವಲ್ಲಿ ಎದುರಿಸಿದ ಸಮಸ್ಯೆ ಮತ್ತು ಬೆಳೆದ ಪರಿಯನ್ನು ಒಂದು ಮಿತಿಯಲ್ಲಿ ಕಟ್ಟಿ ಕೊಡಲಾಗಿದೆ.

ಅದೇ ವಿಜಯಾನಂದ..!

ರಿಶಿಕಾ ಶರ್ಮಾ ‌ನಿರ್ದೇಶನದ ಈ ಬಯೋಪಿಕ್ ಮೊದಲು ಗಮನ ಸೆಳೆಯುವುದು ಸವೆದು ಹೋದ ಕಾಲಘಟ್ಟವನ್ನು ಮತ್ತೆ ಅದೇ ಮಾದರಿಯಲ್ಲಿ ಕಟ್ಟಿ ಕೊಡುವುದರಲ್ಲಿ..

ಎರಡನೇಯದು ಅದಮ್ಯ ಛಲ ಮತ್ತು ಉತ್ಸಾಹ ಕಣ್ಣು ಮತ್ತು ದೇಹ ಭಾಷೆಯಲ್ಲಿ ತುಂಬಿಕೊಂಡ ಯುವಕ ಆತಂಕವನ್ನೂ ಸಮ ಚಿತ್ತದಿಂದ ಎದುರಿಸುವ ದಿಟ್ಟತನ ಅನುಪಮ.

‘ಸಂಪತ್ತು ಸಾಹಸಿಯ ಪರ’ ಎಂಬುದಕ್ಕೆ ನಿದರ್ಶನವಾದ ಆ ಯುವಕ ಬೆಳೆಯುವ ಪರಿ ರೋಚಕ. ವಿ.ಆರ್.ಎಲ್ ಸಂಸ್ಥೆ ಕನ್ನಡ ನೆಲದ ಮೂಲೆ ಮೂಲೆಯಲ್ಲಿ ಬೇರು ಬಿಟ್ಟು ವಿಸ್ತಾರವಾದ ನೆಲೆ ಕಂಡುಕೊಂಡಿರುವುದರಿಂದ ಈ ಚಿತ್ರ ಹೆಚ್ಚು ಆಪ್ತವೆನಿಸುತ್ತದೆ..

ಮಹಾನ್ ಸಾಧನೆ ಮಾಡಿದ ವ್ಯಕ್ತಿಯ ಬದುಕಿನಲ್ಲಿ ನಡೆದಿರಬಹುದಾದ ನೈಜ ಘಟನೆಗಳನ್ನು ತೆರೆಯ ಮೇಲೆ ಸಮರ್ಥವಾಗಿ ಅಭಿವ್ಯಕ್ತಿಸುವಲ್ಲಿ ‘ವಿಜಯಾನಂದ’ ಸಫಲವಾಗಿದೆ. ನಿಜವಾಗಿ ಚಿತ್ರವೊಂದು ಭಾವುಕ ಪಯಣ. ಹಾಗಾಗಿ ಪ್ರೇಕ್ಷಕ ಇಲ್ಲಿ ವಿ.ಆರ್.ಎಲ್ ನ ಯಾತ್ರಿಕ.

‘ನೈತಿಕ ತಳಹದಿಯ ಮೇಲೆ ಕಟ್ಟಿದ ಸಂಸ್ಥೆ ಎಂದಿಗೂ ಸೋಲುವುದಿಲ್ಲ..’
ಎಂಬುದಕ್ಕೆ ನಿದರ್ಶನ ನಮ್ಮ ಸಂಸ್ಥೆ ಎಂಬುದನ್ನು ಗಟ್ಟಿಯಾಗಿಯೇ ಪ್ರತಿಪಾದಿಸಲಾಗಿದೆ.

ವಿ ಆರ್ ಎಲ್ ಪ್ರೊಡಕ್ಷನ್ ಮೂಲಕ ಚಿತ್ರವನ್ನು ನಿರ್ಮಿಸಿರುವ ಆನಂದ್ ಸಂಕೇಶ್ವರ ಅವರ ನಿರೂಪಣೆ ಆಪ್ತ ವೆನಿಸುವುದರ ಜೊತೆಗೆ ಸಂಸ್ಥೆ ಕಟ್ಟುವಲ್ಲಿ ಅವರ ಪರಿಶ್ರಮವೂ ಎದ್ದು ಕಾಣುತ್ತದೆ.

ವಿಜಯ ಸಂಕೇಶ್ವರ್ ಮಾಧ್ಯಮ ಲೋಕದಲ್ಲಿ ಮಾಡಿದ ಕ್ರಾಂತಿ ಅನನ್ಯ.. ಅದರ ವಿವರ ಹೇಳುವಾಗ ಕೊಂಚ ನಿಧಾನ ಎನಿಸುವುದನ್ನು ಬಿಟ್ಟರೆ ಇದೊಂದು ಅತ್ಯುತ್ತಮ ಮನರಂಜನಾತ್ಮಕ ಮತ್ತು ಸ್ಫೂರ್ತಿದಾಯಕ ಚಿತ್ರ.

ಹಾಗೆಯೇ ಅವರು ಒಂದು ರಾಜಕೀಯ ಪಕ್ಷ ಕಟ್ಟಿದ ವಿವರಗಳು ಚಿತ್ರದ ಭಾಗವಾಗಿಲ್ಲ.. ಮತ್ತು ಅದು ಕೊರತೆಯೂ ಅಲ್ಲ..

ಮುಖ್ಯ ಪಾತ್ರ ನಿರ್ವಹಿಸಿರುವ ನಿಹಾಲ್ ರಜಪೂತ್ ಅವರದು ಅತ್ಯುತ್ತಮ ಅಭಿನಯ. ಹಿರಿಯ ನಟ ಅನಂತ್ ನಾಗ್ ಎಂದಿನ ಸಹಜ ನಟನೆ ಮೆರೆದರೆ, ಕ್ರೇಜಿಸ್ಟಾರ್ ರವಿಚಂದ್ರನ್ ಅವರನ್ನು ನೋಡುವುದೇ ಥ್ರಿಲ್.

ಇನ್ನುಳಿದಂತೆ ಸಿರಿ ಪ್ರಹ್ಲಾದ್, ಭರತ್ ಭೂಪಣ್ಣ, ವಿನಯ ಪ್ರಕಾಶ್, ಅರ್ಚನಾ ಕೊಟ್ಟಿಗೆ, ಪ್ರಕಾಶ್ ಬೆಳವಾಡಿ, ದಯಾಳ್ ಪದ್ಮನಾಬ್, ರಮೇಶ್ ಭಟ್, ಗಣೇಶ್ ರಾವ್, ನಟರಾಜ್  ಮೊದಲಾದವರ ಅಭಿನಯ ಅಚ್ಚುಕಟ್ಟು.

ಕೀರ್ತನ್ ಪೂಜಾರಿ ಛಾಯಾಗ್ರಹಣ, ಗೋಪಿ ಸುಂದರ್ ಸಂಗೀತ ಚಿತ್ರಕ್ಕೆ ಪೂರಕ..

* ತಳ ಸಮುದಾಯದ ಹೆಮ್ಮೆ

* ಅಪ್ರತಿಮ ಗ್ರಾಮೀಣ ಪ್ರತಿಭೆ

* ಸರ್ಕಾರಿ ಅಧಿಕಾರಿಯ ಪುತ್ರಿ

ಇದು ತಳ ಸಮುದಾಯದಿಂದ ಬಂದ ಯುವತಿಯೊಬ್ಬರ ಅದ್ವಿತೀಯ ಸಾಧನೆ ಮತ್ತು ಯಶೋಗಾಥೆ..

ವಿಶ್ವಸಂಸ್ಥೆಯ ಮಾನವ ಹಕ್ಕು ಸಮಿತಿ (ಯು.ಎನ್.ಎಚ್.ಆರ್.ಸಿ.)ಗೆ ನೇಮಕವಾಗುವ ಮೂಲಕ
ಕೋಲಾರದ ಪುಟ್ಟ ಹಳ್ಳಿಯೊಂದರಿಂದ ಬಂದ ಅಧಿಕಾರಿಯೊಬ್ಬರ ಪುತ್ರಿ
ಡಾ.ಕೆ.ಪಿ.ಅಶ್ವಿನಿ ತಳ ಸಮುದಾಯ ಹೆಮ್ಮೆ ಪಡುವ ಸಾಧನೆ ಮಾಡಿದ್ದಾರೆ.

ವಿಶ್ವಸಂಸ್ಥೆಯ ಈ ಪ್ರತಿಷ್ಠಿತ ಹುದ್ದೆಗೆ ನೇಮಕವಾದ ಏಷ್ಯಾದ ಪ್ರಪ್ರಥಮ ಮಹಿಳೆಯಾಗಿದ್ದಾರೆ ಎಂಬುದು ವಿಶೇಷ ಮತ್ತು ವಿರಳ ಸಂಗತಿಯಾಗಿದೆ.

ಕೋಲಾರ ತಾಲ್ಲೂಕಿನ ಕುರುಬರ ಹಳ್ಳಿ ಎಂಬ ಗ್ರಾಮದ ರಾಜ್ಯ ಸರ್ಕಾರಿ ಅಧಿಕಾರಿ ವಿ.ಪ್ರಸನ್ನಕುಮಾರ್ ಹಾಗೂ ಜಯಮ್ಮ ದಂಪತಿಗಳ ಪುತ್ರಿಯಾಗಿರುವ ಅಶ್ವಿನಿ ಚಿಕ್ಕ ವಯಸ್ಸಿನಿಂದಲೂ ಓದಿನಲ್ಲಿ ಮುಂದು.. ಅಪ್ರತಿಮ ಪ್ರತಿಭಾವಂತೆಯಾಗಿರುವ ಇವರಿಗೆ ವಿಶ್ವ ಸಂಸ್ಥೆ ಮನ್ನಣೆ ದೊರೆತಿರುವುದು ಅವರ ಪರಿಶ್ರಮಕ್ಕೆ ದೊರೆತ ಫಲವಾಗಿದೆ.

ಅಶ್ವಿನಿ ಬೆಂಗಳೂರಿನ ಮೌಂಟ್ ಕಾರ್ಮಲ್ ಕಾಲೇಜಿನಲ್ಲಿ ಪದವಿ ಹಾಗೂ ಸೇಂಟ್ ಜೊಸೆಫ್ಸ್ ಕಾಲೇಜಿನಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ನವದೆಹಲಿಯ ಜವಹರಲಾಲ್ ವಿಶ್ವವಿದ್ಯಾಲಯ (ಜೆಎನ್ ಯು)ದಲ್ಲಿ ಎಂ.ಪಿಲ್, ಪಿ.ಎಚ್.ಡಿ ಪಡೆದ ಸಾಧಕಿ ಇವರಾಗಿದ್ದಾರೆ.

ಮೌಂಟ್ ಕಾರ್ಮಲ್ ಕಾಲೇಜಿನಲ್ಲಿ ಕೆಲ ಕಾಲ ಉಪನ್ಯಾಸಕಿಯಾಗಿ, ಸೆಂಟ್ ಜೋಸೆಫ್ಸ್ ಕಾಲೇಜಿನಲ್ಲಿ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸಿರುವ ಅಶ್ವಿನಿ, ಡಾ.ಬಿ.ಆರ್.ಅಂಬೇಡ್ಕರ್ ಸಿದ್ಧಾಂತಗಳ ಪ್ರತಿಪಾದಕರಾಗಿ ದಲಿತ ಚಳುವಳಿ ಹಾಗೂ ಆದಿವಾಸಿಗಳ ಹಕ್ಕು ಪ್ರತಿಪಾದನೆಯ ದಿಕ್ಕಿನಲ್ಲಿ ಹೋರಾಟ ಮಾಡಿದ್ದಾರೆ.

ಜಿನೀವಾ ಮೂಲದ 47 ಮಂದಿ ಸದಸ್ಯರ ವಿಶ್ವಸಂಸ್ಥೆಯ ಮಾನವ ಹಕ್ಕು ಸಂಸ್ಥೆ ಡಾ.ಅಶ್ವಿನಿ ಅವರ ನೇಮಕಾತಿಯನ್ನು ಅನುಮೋದಿಸಿದ್ದು, ಅವರು ವರ್ಣಭೇದ ಹಾಗೂ ಅಸಹಿಷ್ಣುಗೆ ಸಂಬಂಧಿಸಿದ ವಿಷಯಗಳನ್ನು ನಿರ್ವಹಿಸಬೇಕಾಗಿದೆ.

ಸ್ವಾತಂತ್ರೋತ್ಸವದ ಅಂಗವಾಗಿ ಬೆಂಗಳೂರಿನ ಲಾಲ್ ಬಾಗ್ ನಲ್ಲಿ ನಡೆಯುವ ಚಾರಿತ್ರಿಕ ಫಲ ಪುಷ್ಪ ಪ್ರದರ್ಶನದಲ್ಲಿ ಈ ಬಾರಿ ಕರ್ನಾಟಕ ರತ್ನ ಡಾ.ರಾಜ್ ಕುಮಾರ್ ಹಾಗೂ ಪುನೀತ್ ರಾಜ್‍ಕುಮಾರ್ ಪ್ರತಿಬಿಂಬಿಸುವ ವಿಶೇಷ ಫಲಪುಷ್ಪ ಪ್ರದರ್ಶನ ಏರ್ಪಡಿಸಲಾಗುತ್ತಿದೆ.

ಆಗಸ್ಟ್ 5 ರಿಂದ 15 ರವರೆಗೂ ನಡೆಯಲಿರುವ ಫಲಪುಷ್ಪ ಪ್ರದರ್ಶನದಲ್ಲಿ ಕನ್ನಡದ ಜನ ಮಾನಸದಲ್ಲಿ ದೇವರಂತೆ ಕಂಗೊಳಿಸುತ್ತಿರುವ ವರನಟ ಡಾ.ರಾಜ್ ಕುಮಾರ್ ಹಾಗೂ ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ವಿಷಯಾಧಾರಿತ ವಿಶೇಷ ಫಲಪುಷ್ಪ ಪ್ರದರ್ಶನ ಜರುಗಲಿದೆ.

ತೋಟಗಾರಿಕಾ ಇಲಾಖೆ ಅಧಿಕಾರಿಗಳು ಈಗಾಗಲೇ ದೊಡ್ಮನೆ ಕುಟುಂಬದ ಸದಸ್ಯರನ್ನು ಭೇಟಿ ಮಾಡಿ ಪ್ರದರ್ಶನದ ವಿವರ ನೀಡಿ, ಆಹ್ವಾನ ನೀಡಿದ್ದಾರೆ.

ಆಗಸ್ಟ್ 5ರಂದು ಲಾಲ್ ಬಾಗ್ ಫಲಪುಷ್ಪ ಪ್ರದರ್ಶನ ಉದ್ಘಾಟನೆ ಗೊಳ್ಳಲಿದ್ದು, ಹ್ಯಾಟ್ರಿಕ್ ಹೀರೋ ಡಾ.ಶಿವರಾಜಕುಮಾರ್, ರಾಘವೇಂದ್ರ ರಾಜಕುಮಾರ್ ಹಾಗೂ ಪುನೀತ್ ರಾಜಕುಮಾರ್ ಧರ್ಮಪತ್ನಿ ಅಶ್ವಿನಿ ಪುನೀತ್ ರಾಜ್ ಕುಮಾರ್ ಅವರನ್ನು ಈ ಸಂದರ್ಭಕ್ಕೆ ಆಹ್ವಾನಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಉದ್ಯಾನ ಕಲಾಸಂಘದ ಉಪಾಧ್ಯಕ್ಷ ವಾಸುದೇವ್. ತೋಟಗಾರಿಕೆ ಜಂಟಿ ನಿರ್ದೇಶಕ ಡಾ. ಎಂ ಜಗದೀಶ್ ಹಾಗೂ ಲಾಲ್ ಬಾಗ್ ತೋಟಗಾರಿಕೆ ಉಪನಿರ್ದೇಶಕಿ ಜಿ ಕುಸುಮ ದೊಡ್ಮನೆ ಭೇಟಿ ಸಂದರ್ಭದಲ್ಲಿ ಹಾಜರಿದ್ದರು.

ಮುಗ್ಧ ನಗೆಯ ಸಾಹುಕಾರ

ಕಾಲದ ಜೊತೆ ಜೊತೆಗೆ ನಡೆಯುತ್ತಾ ಕಾಲಮಾನಕ್ಕೆ ತಕ್ಕಂತೆ ಸಿನಿಮಾ ಮಾಡುತ್ತಾ ನಡೆದ ಕನ್ನಡದ ಹೆಮ್ಮೆಯ ನಟ ಹ್ಯಾಟ್ರಿಕ್ ಹೀರೋ ಡಾ.ಶಿವರಾಜ್ ಕುಮಾರ್ ಸುಮಾರು ಮೂರು ದಶಕದ ಎಲ್ಲಾ ಪೀಳಿಗೆಯ ಅವರ ವರಸೆಯ ಅವರ ಸಮಕಾಲೀನ ನಟ..

ಸದ್ಯದ ಹಿರಿಯ ನಟ ಎಂಬುದು ಗೊತ್ತಿದ್ದರೂ ಶಿವಣ್ಣ ಸಾರ್ವಕಾಲಿಕ ನಾಯಕ ನಟ ಎಂಬುದು ಅತ್ಯಂತ ಸೂಕ್ತ. ಎಲ್ಲಾ ಜಮಾನದ ನಟರ ಜೊತೆ ಸಮನಾಗಿ ಬೆರೆಯಬಲ್ಲ ಮತ್ತು ಅವರ ನಡುವೆ ಮೆರೆಯಬಲ್ಲ ಕನ್ನಡದ ಏಕೈಕ ಪ್ರತಿಭೆ.

ಇಂದು ಅಂದರೆ ಜುಲೈ 12 ಅವರ ಹುಟ್ಟುಹಬ್ಬ.. ಇದು ಸಾಮಾನ್ಯವಲ್ಲ; ಅವರ 60ನೇ ಹುಟ್ಟುಹಬ್ಬ. ಅರೇ.. ಶಿವರಾಜ್ ಕುಮಾರ್ ಅವರಿಗೆ ಇಷ್ಟು ವಯಸ್ಸಾ.. ನೋ ಚಾನ್ಸ್.. ನಂಬುವ ಪ್ರಶ್ನೆಯೇ ಇಲ್ಲ..

ಇತ್ತೀಚೆಗಂತೂ ತಮ್ಮ ವಿನಮ್ರ ನಡವಳಿಕೆಯಿಂದ ಎಲ್ಲರ ಮನಸ್ಸು ಗೆಲ್ಲುತ್ತಿದ್ದಾರೆ. ಶಿವಣ್ಣ ಅವರಂತೆ ಕೊಂಚವೂ ಬಿಂಕ ಬಿಗುಮಾನ ಅಹಂ ಇಲ್ಲದ ಮತ್ತೊಬ್ಬರನ್ನು ಕನ್ನಡ ಚಿತ್ರರಂಗ ಇರಲಿ ಇಡೀ ಭಾರತೀಯ ಚಿತ್ರರಂಗದಲ್ಲಿ ನೋಡಲು ಸಾಧ್ಯವಿಲ್ಲ..

ಏಕೆಂದರೆ ಶಿವಣ್ಣ ಗುಡಿಸಲು ಮಾದರಿಯ ಹೊಟೇಲ್ ಗೆ ಬಂದು ಅಲ್ಲೇ ಕಲ್ಲು ಹಾಸಿನ ಮೇಲೆ ಕುಳಿತು ಮಾಮೂಲಿ ಲೋಟದಲ್ಲಿ ಚಹ ಕುಡಿದು ಹೋಗುವಷ್ಟು ಸರಳ..

ಅಷ್ಟು ಸರಳತೆಯ ಜೊತೆಗೆ ಮಗುವಿನ ಮನಸ್ಸು.. ‘ಎಂಥಾ ಸೊಗಸ್ಸು ಮಗುವಿನ ಮನಸ್ಸು..’ ಎಂಬ ಅಣ್ಣಾವ್ರ ಹಾಡಿನಂತೆ ಶಿವಣ್ಣ ಸರಳತೆ ಮತ್ತು ವಿನಮ್ರ ಮನಸ್ಸಿನ ಸೊಗಸು ಮೈವೆತ್ತ ಸಂಸ್ಕಾರವಂತ ಸ್ಟಾರ್ ನಟ.

ಇರಲಿ; ಸ್ವಲ್ಪ ಹಿಂದಕ್ಕೆ ಹೋಗಿ ಶಿವಣ್ಣನವರ ಸಿನಿಮಾ ಪ್ರಯಾಣವನ್ನು ಗಮನಿಸೋಣ.. ಅದು 80ರ ದಶಕದ ಕೊನೆ. ಆಗಿನ ಕಾಲದಲ್ಲಿ ಕನ್ನಡ ಚಿತ್ರಗಳಿಗೆ ಒಂದು ಕೊರತೆ ಎದುರಾಗಿತ್ತು. ಅದು ಆಗಿನ ಹೊಸ ಪೀಳಿಗೆಗೆ ಅನುಗುಣವಾದ ಡಿಸ್ಕೋ ಕುಣಿತ.

ಹೌದು ಆಗ ಇಡೀ ವಿಶ್ವದಲ್ಲಿ ಮೈಕೆಲ್ ಜಾಕ್ಸನ್ ಅವರ ಪ್ರಭಾವ ಹೆಚ್ಚಾಗಿತ್ತು. ಭಾರತೀಯ ಚಿತ್ರರಂಗದಲ್ಲಿ ಅದು ಶುರುವಾಗಿತ್ತು. ಹಿಂದಿಯಲ್ಲಿ ಡಿಸ್ಕೋ ಡ್ಯಾನ್ಸರ್ ಮೂಲಕ ಮಿಥುನ್ ಚಕ್ರವರ್ತಿ, ಆನಂತರ ‘ಇಲ್ಜಾಮ್’ ಎಂಬ ಚಿತ್ರದ ಮೂಲಕ ಬಂದ ಗೋವಿಂದ ಅಬ್ಬರಿಸುತ್ತಿದ್ದರು. ಅತ್ತ ತಮಿಳಿನಲ್ಲಿ ತಾಯ್ ನಾಗೇಶ್ ಪುತ್ರ ಆನಂದ್ ಬಾಬು ‘ಪಾನಂ ವಾನಂ ಬಾಡಿ’ಯಂತಹ ಡ್ಯಾನ್ಸ್ ಮಾದರಿಯ ಚಿತ್ರ ಮಾಡಿ ಮಿಂಚುತ್ತಿದ್ದರು. ಆ ಚಿತ್ರ ಡಿಸ್ಕೋ ಡ್ಯಾನ್ಸರ್ ರೀಮೇಕ್ ಆಗಿತ್ತು. ಅಲ್ಲಿ ರಾಜೇಶ್ ಖನ್ನ ಮಾಡಿದ್ದ ಪಾತ್ರವನ್ನು ಇಲ್ಲಿ ತಾಯ್ ನಾಗೇಶ್ ಅವರೇ ಮಾಡಿದ್ದರು. ತೆಲುಗಿನಲ್ಲಿ ಚಿರಂಜೀವಿ ಡ್ಯಾನ್ಸ್ ಅಬ್ಬರ ಹೆಚ್ಚಾಗಿತ್ತು.

ಇಂತಹ ಕಾಲಘಟ್ಟದಲ್ಲಿ ಆಧುನಿಕ ಡ್ಯಾನ್ಸ್ ಮಾಡುವ ಯುವ ನಟ ಕನ್ನಡಕ್ಕೆ ಬೇಕಾಗಿತ್ತು.. ಅದು ಕೊರತೆಯಾಗಿತ್ತು. ಆಗ ಬಂದರು ಶಿವರಾಜ್ ಕುಮಾರ್..!

ಆನಂದ್ ನಲ್ಲಿ ‘ಟುವಿ ಟುವಿ..’ ಎಂದು ಹಾಡುವ ಡ್ಯಾನ್ಸ್ ನೋಡಿದ ಯುವ ಪಡೆಯ ಸಂತಸಕ್ಕೆ ಪಾರವೇ ಇರಲಿಲ್ಲ; ‘ಟಿಕ್ ಟಿಕ್ ಬರುತ್ತಿದೆ ಕಾಲ..’ ‘ನಗುವು ಚೆನ್ನ..ಮೊಗವು ಚೆನ್ನ..’ ಎಲ್ಲಾ ಹಾಡಿನಲ್ಲಿಯೂ ಶಿವರಾಜ್ ಕುಮಾರ್ ಡ್ಯಾನ್ಸ್ ಚೆನ್ನ. ಆಗ ಡ್ಯಾನ್ಸ್ ಪಂರಂಪರೆಗೆ ನಾಂದಿ ಹಾಡಿದ ಶಿವರಾಜ್ ಕುಮಾರ್ ಮಾಡದ ಡ್ಯಾನ್ಸ್ ಇಲ್ಲ; ಆದರೂ ರಿಯಾಲಿಟಿ ಶೋನಲ್ಲಿ ಕುಳಿತು ಶಾಲಾ ಹುಡುಗನಂತೆ ಪ್ರತಿ ಡ್ಯಾನ್ಸ್ ನ್ನು ಬೆರಗುಗಣ್ಣಿನಿಂದ ಅವರು ನೋಡುವ ಪರಿಯೇ ಅಚ್ಚರಿ.

80-90ರ ದಶಕದಲ್ಲಿ ಅದೊಂದೇ ಪವಾಡ ನಡೆಯಲ್ಲಿಲ್ಲ.. ಕನ್ನಡದಲ್ಲಿ ಹೊಸ ಬಗೆಯ ಚಿತ್ರಗಳು ಬೇಕು ಎಂದು ಹಂಬಲಿಸುತ್ತಿದ್ದ ದಿನಗಳಲ್ಲಿ ಮೊದಲು ಬಂದಿದ್ದೇ ‘ಓಂ’ ಅದು ಬೇರೆ ಬಗೆಯ ಚಿತ್ರಗಳಿಗೆ ಮುನ್ನುಡಿ ಬರೆದ ಚಿತ್ರ.

ತಂದೆ ಡಾ.ರಾಜ್ ಕುಮಾರ್ ಅವರು ಮೇರುನಟ, ವರನಟ ಎಲ್ಲವೂ ಆಗಿದ್ದರೂ ಅವರ ಪ್ರಭಾವಳಿಗೆ ಸಿಲುಕದೆ ಬೆಳೆದ ಮಹಾನ್ ನಟ ಶಿವರಾಜ್ ಕುಮಾರ್ ಎಂದರೆ ಅದು ಅತಿಶಯೋಕ್ತಿ ಅಲ್ಲವೇ ಅಲ್ಲ..

ಈ ಕರುನಾಡ ಚಕ್ರವರ್ತಿ ಇಲ್ಲಿಯವರೆಗೂ125ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿದರೂ ಪ್ರತಿ ಹೊಸ ಪೀಳಿಗೆಗೆ ಅದೇ ಮಾದರಿಯ ಚಿತ್ರ ಕೊಟ್ಟ ಹೆಗ್ಗಳಿಕೆ ಇರುವ ನಟ. ಈಗಲೂ ಇಂದಿನ ಪೀಳಿಗೆಯ ಚಿತ್ರವನ್ನೇ ಮಾಡುತ್ತಿದ್ದಾರೆ. ಅದು ಸಿನಿಮಾ ಜಗತ್ತಿನ ಅಚ್ಚರಿಯೋ ಅಥವಾ ವಯಸ್ಸೇ ಆಗದ ಶಿವಣ್ಣ ಪ್ರಭಾವಳಿಯೋ ಎಂಬುದು ಸೋಜಿಗದ ಸಂಗತಿ..!

🌷ನಲ್ಮೆಯ, ನೆಚ್ಚಿನ ನಟ, ಸದಾ ನವತರುಣರಾಗಿರುವ ಶಿವಣ್ಣ ಅವರಿಗೆ ಹುಟ್ಟುಹಬ್ಬದ ಶುಭಾಶಯ ಹೇಳೋಣ..🎂🌹

🖋ಸ್ನೇಹಪ್ರಿಯ ನಾಗರಾಜ್

ಇದೊಂದು ಕಿರುಚಿತ್ರ. ಹೆಸರು ಅಂತರ್ಕಲಹ. ಮನುಷ್ಯನ ಮನಸ್ಸಿನೊಳಗಿನ ತೊಳಲಾಟ ಮತ್ತು ಅಶಾಂತ ಅಂತರ್ಮುಖಿ ಭಾವನೆಗಳನ್ನು ವ್ಯಕ್ತಪಡಿಸುವ ಆಶಯದಲ್ಲಿ ಮೂಡಿ ಬಂದಿರುವ ಚಿತ್ರ.

ಮುಖ್ಯವಾಗಿ ಒಬ್ಬ ನಿರ್ದೇಶಕ ಆರಂಭದಲ್ಲಿ ತಾನೊಬ್ಬ ಕ್ರಿಯಾಶೀಲ ಎಂದು ಸಾಬೀತುಪಡಿಸಲು ಮಾಡಿದ ಚಿತ್ರ. ಆದರೆ ಒಬ್ಬಂಟಿ ಮನುಷ್ಯ ಮನಸ್ಸಿನ ಭಾವನೆಗಳನ್ನು ಹಿಂಸಾತ್ಮಕಗೊಳಿಸುವುದು ಮತ್ತು ರಕ್ತಸಿಕ್ತ ಸ್ಥಿತಿಯನ್ನು ಮತ್ತೆ ಮತ್ತೆ ಅನುಭವಿಸುವುದು ಮಾತ್ರ ಏಕೆಂದು ಅರ್ಥವಾಗುವುದಿಲ್ಲ..

ಪ್ರತಿ ಮನುಷ್ಯನ ಮನಸ್ಸು ಹಿಂಸೆಗೆ ಪ್ರಚೋದನೆ ನೀಡುವುದಿಲ್ಲ ಮತ್ತು ಹಿಂಸೆಯನ್ನು ಮಾಡಲು ಬಯಸುವುದಿಲ್ಲ. ಅದೇಕೆ ನಿರ್ದೇಶಕ ಆಕಾಶ್ ಅವರಲ್ಲಿ ಇಂತಹ ಹಿಂಸಾರೂಪ ಮೈದಳೆಯಿತೋ ಎಂಬುದು ಪ್ರಶ್ನೆಯಾಗಿ ಕಾಡಿತು.

ಚಿತ್ರಗಳು : ಕೆ.ಎನ್.ನಾಗೇಶ್ ಕುಮಾರ್

ಅಂದ ಹಾಗೆ ನಟ ಅರುಣ್ ಸಾಗರ್ ಹಾಗೂ ಇತರರು ಕಿರುಚಿತ್ರದಲ್ಲಿ ಅಭಿನಯಿಸಿದ್ದಾರೆ. ನಿರ್ದೇಶಕ ಅಲೋಕ್, ನಟ, ನಿರೂಪಕ ನಿರಂಜನ್ ಹಾಗೂ ಇತರರು ಈ ಸಂದರ್ಭದಲ್ಲಿ ಹಾಜರಿದ್ದರು.

ಅಪ್ಪನಿಗೆ ಒಂದು ಆಸೆಯಿತ್ತು; ನಾನು ಬರೆದಿರುವ ಈ ವಿಷಯ ಸಿನಿಮಾವಾಗಬೇಕು.. ಆದರೆ ವಿಧಿ ವಿಪರ್ಯಾಸ ಆ ಕಲ್ಪನೆ ರೂಪುಗೊಳಿಸುವುದಕ್ಕೆ ಮುನ್ನವೇ ಅಪ್ಪ ಕಾಲನ ಕರೆಗೆ ಓಗೊಟ್ಟು ಮಗನನ್ನು ಬಿಟ್ಟು ನಡೆದು ಬಿಟ್ಟರು…

ಆದರೆ ಮಗ ಸುಮ್ಮನಿರಲಿಲ್ಲ; ಅಪ್ಪನ ಸ್ಕ್ರಿಪ್ಟ್ ತೆಗೆದು ಸಿನಿಮಾ ಮಾಡಿಯೇ ಬಿಟ್ಟ.. ಅದುವೆ ಸಿಂಧೂರ.! ಈಗ ಸಿದ್ದವಾಗಿ ಪ್ರೇಕ್ಷಕನ ಮುಂದೆ ಬರುವ ಹವಣಿಕೆಯಲ್ಲಿದೆ..

ಅಂದ ಹಾಗೆ ಕನ್ನಡ ಚಿತ್ರರಂಗದಲ್ಲಿ ಸಾಕಷ್ಟು ಗುರುತಿಸಿಕೊಂಡಿದ್ದ ದಿವಂಗತ ರಾಮ್ ಪುರೋಹಿತ್ ಅವರು ಎಂಟು ವರ್ಷಗಳ ಹಿಂದೆ ಬರೆದಿಟ್ಟಿದ್ದ ಕೃತಿ ಸಿನಿಮಾವಾಗಿದೆ. ಇದನ್ನು ಸಾಧ್ಯವಾಗಿಸಿದ್ದು ಅವರ ಪುತ್ರ ಸಚ್ಚಿನ್ ಪುರೋಹಿತ್.

ಸಚ್ಚಿನ್ ನಟ, ನಿರ್ದೇಶಕ, ನಿರ್ಮಾಪಕ, ಛಾಯಾಗ್ರಾಹಕ ಎಲ್ಲವೂ ಆಗಿ ದುಡಿದಿರುವ ಸಿಂಧೂರ ತೆರೆಗೆ ಬರಲು ಸಜ್ಜಾಗಿದೆ. ಚಿತ್ರದ ಹಾಡುಗಳು ಹಾಗೂ ಟ್ರೈಲರ್ ಬಿಡುಗಡೆ ಸಮಾರಂಭದಲ್ಲಿ ವಾಣಿಜ್ಯ ಮಂಡಳಿ ಉಪಾಧ್ಯಕ್ಷ ಉಮೇಶ್ ಬಣಕಾರ್, ಸ್ವಸ್ತಿಕ್ ಶಂಕರ್ ಹಾಗೂ ಇತರರು ಉಪಸ್ಥಿತರಿದ್ದರು.

ನಟಿಯರಾದ ನಿವೀಕ್ಷಾ, ಸುರಕ್ಷಾ ಶೆಟ್ಟಿ ಹಾಗೂ ಚಿತ್ರತಂಡದ ಸದಸ್ಯರು ತಮ್ಮ ಅನುಭವ ಹೇಳಿಕೊಂಡರು. ಆರನ್ ಕಾರ್ತಿಕ್ ವೆಂಕಟೇಶ್ ಸಂಗೀತ ಸಂಯೋಜಿಸಿದ್ದು, ಹಾಡುಗಳ ಪರಿಚಯ ಮಾಡಿಕೊಡಲಾಯಿತು.

ಖ್ಯಾತ ಸಂಗೀತ ನಿರ್ದೇಶಕ ಅಭಿಮಾನ್ ರಾಯ್, ನಿರ್ದೇಶಕ, ಸಂಕಲನಕಾರ ನಾಗೇಂದ್ರ ಅರಸ್ ಮತ್ತಿತರರು ಚಿತ್ರಕ್ಕೆ ಶುಭ ಹಾರೈಸಲು ಬಂದಿದ್ದರು.

ಅಪ್ಪನ ಸ್ಫೂರ್ತಿ ನಮಗೆ ದಾರಿದೀಪವಾಯಿತು‌ ಎಂದು ತಂದೆಯನ್ನು ನೆನೆಯುತ್ತ ಚಿತ್ರದ ಬಗ್ಗೆ ಹೇಳಿಕೊಂಡರು ಸಚ್ಚಿನ್ ಪುರೋಹಿತ್.