ಸಿನಿ ಹನಿ

ಹಾರರ್ ಕಾಮಿಡಿ ‘ಛೂ ಮಂತರ್’ ಚಿತ್ರದಲ್ಲಿ ಶರಣ್ ಜೊತೆಗೆ ಮೇಘನಾ ಗಾಂವ್ಕರ್ ನಟಿಸಿದ್ದಾರೆ. ಚಿಕ್ಕಣ್ಣ, ಅದಿತಿ ಪ್ರಭುದೇವ ಹಾಗೂ ಪ್ರಭು ಮುಂಡ್ಕರ್ ಈ ಚಿತ್ರದ ಪ್ರಮುಖ ಪಾತ್ರದಲ್ಲಿದ್ದಾರೆ.

ಮುಖ್ಯವಾಗಿ ಇದು ಶರಣ್ ಹಾಗೂ ಚಿಕ್ಕಣ್ಣ ಜೊತೆಗೂಡಿರುವ ಚಿತ್ರ. ಈ ಕಾಮಿಡಿ ಕಿಲಾಡಿ ಜೋಡಿ ಮತ್ತೆ ಕಮಾಲ್ ಮಾಡಲಿದೆ.

ಮಾನಸ ತರುಣ್ ಹಾಗೂ ತರುಣ್ ಶಿವಪ್ಪ ನಿರ್ಮಿಸುತ್ತಿರುವ ಚಿತ್ರಕ್ಕೆ
‘ಕರ್ವ’ ಮೂಲಕ ಹೆಸರಾಗಿರುವ ನವನೀತ್ ನಿರ್ದೇಶಕರು.

ಚಿತ್ರದ ಮಾತಿನ ಭಾಗದ ಚಿತ್ರೀಕರಣ ಮುಕ್ತಾಯವಾಗಿದ್ದು, ಬಿಡುಗಡೆಗೆ ಸಜ್ಜಾಗುತ್ತಿದೆ. ಬೆಂಗಳೂರು, ಮೈಸೂರು, ಉತ್ತರಕಾಂಡ ಹಾಗೂ ಲಂಡನ್ ನಲ್ಲಿ ಚಿತ್ರೀಕರಣ ನಡೆದಿದೆ.

ಆರ್. ಸುರೇಶಬಾಬು ನಿರ್ಮಿಸಿ, ರಂಗಕರ್ಮಿ ರಮೇಶ್ ಬೇಗಾರ್ ನಿರ್ದೇಶಿಸಿರುವ ‘ವೈಶಂಪಾಯನ ತೀರ..’ ಚಿತ್ರಕ್ಕೆ ಸೆನ್ಸಾರ್ ಮುಗಿದಿದೆ..

ಹೆಸರಾಂತ ಕಥೆಗಾರ ಮಹಾಬಲ ಮೂರ್ತಿ ಕೊಡ್ಲೆಕೆರೆ ಅವರ ಸಣ್ಣಕತೆಯನ್ನು ಆಧರಿಸಿರುವ ಈ ಚಿತ್ರದಲ್ಲಿ ಯಕ್ಷಗಾನದ ಹಿನ್ನೆಲೆಯಲ್ಲಿ ಪ್ರಕೃತಿ ಮತ್ತು ಪುರುಷನ ಸಂಬಂಧವನ್ನು ನಿರೂಪಿಸಲಾಗಿದೆ.

ಪ್ರಮೋದ್ ಶೆಟ್ಟಿ ಪ್ರಮುಖ ಪಾತ್ರದಲ್ಲಿರುವ ಈ ಚಿತ್ರದಲ್ಲಿ
ವೈಜಯಂತಿ ಅಡಿಗ, ಉಳಿದಂತೆ ರವೀಶ್ ಹೆಗಡೆ, ಪ್ರಸನ್ನ ಶೆಟ್ಟಿಗಾರ್,
ರಮೇಶ್‌ಭಟ್, ಬಾಬು ಹಿರಣ್ಣಯ್ಯ, ರಮೇಶ್ ಪಂಡಿತ್, ಗುರುರಾಜ
ಹೊಸಕೋಟೆ, ಶೃಂಗೇರಿ ರಾಮಣ್ಣ, ರವಿಕುಮಾರ್ ಪಾತ್ರ ವರ್ಗದಲ್ಲಿ ಇದ್ದಾರೆ.

ರಂಗಭೂಮಿ ಹಿನ್ನೆಯ ಸತೀಶ್‌ಪೈ ಮತ್ತು ಸಂತೋಷ್‌ಪೈ ಇದೇ ಮೊದಲ ಬಾರಿ ಸಿನಿಮಾದಲ್ಲಿ ಕಾಣಿಸಿ ಕೊಂಡಿದ್ದಾರೆ. ಶ್ರೀನಿಧಿ ಕೊಪ್ಪ – ಹಿನ್ನೆಲೆ ಸಂಗೀತ, ಶಶಿರ ಛಾಯಾಗ್ರಹಣ, ಅವಿನಾಶ್ ಸಂಕಲನ ಈ ಚಿತ್ರಕ್ಕಿದೆ.

ಸಂಪತ್ ಮೈತ್ರೇಯ ಹಾಗೂ ಮಹೇಂದ್ರ ಪ್ರಸಾದ್ ಮುಖ್ಯ ಭೂಮಿಕೆಯಲ್ಲಿರುವ ಹಾಗೂ ವಿನೋದ್ ಧಯಾಳನ್ ನಿರ್ದೇಶನವಿರುವ ‘ಜೋಡರ್ನ್’ ಚಿತ್ರದ ಟ್ರೈಲರ್ ಬಿಡುಗಡೆ ಕಂಡಿದೆ.

ಚಿತ್ರವು ಡಿಸೆಂಬರ್ 30ರಂದು ಬಿಡುಗಡೆ ಕಾಣುತ್ತಿದ್ದು, ಟ್ರೈಲರ್ ನ್ನು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಭಾ.ಮ.ಹರೀಶ್ ಬಿಡುಗಡೆ ಮಾಡಿ ಶುಭ ಹಾರೈಸಿದ್ದಾರೆ.

ಅಮೇರಿಕನ್ ಬಾಸ್ಕೆಟ್ ಬಾಲ್ ಆಟಗಾರ ಮೈಕಲ್ ಜೋರ್ಡನ್ ಹೇಳಿರುವ ‘ವೈಫಲ್ಯವನ್ನು ನಾನು ಒಪ್ಪಿಕೊಳ್ಳುತ್ತೇನೆ, ಪ್ರತಿಯೊಬ್ಬರೂ ಯಾವುದಾದರೂ ವಿಷಯದಲ್ಲಿ ವಿಫಲರಾಗುತ್ತಾರೆ ಆದರೆ ಪ್ರಯತ್ನ ಪಡದೇ ವೈಫಲ್ಯವನ್ನು ನಾನು ಎಂದಿಗೂ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ’ ಎಂಬ ಹೇಳಿಕೆಯನ್ನು ಆಧಾರವಾಗಿಟ್ಟುಕೊಂಡು ಈ ಸಿನಿಮಾ ಕಥೆಯನ್ನು ಹೆಣೆಯಲಾಗಿದೆ
ಎಂಬ ವಿವರ ಬಿಚ್ಚಿಟ್ಟರು ನಿರ್ದೇಶಕರು.

ಸೀತಾರ, ಸುನೀಲ್, ಯೋಗೇಶ್ ಶಂಕರ್ ನಾರಾಯಣನ್, ಗಣೇಶ್ ಜೈ ಕುಮಾರ್ ಚಿತ್ರದ ಇತರ ತಾರಾ ಬಳಗದಲ್ಲಿದ್ದಾರೆ.

ಜೆ.ಜಾನಕಿರಾಮ್, ಎನ್ ಆರ್.ಪಾಟೀಲ್ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಜೈಕುಮಾರ್ ಜೆ ಸ್ಟಾಲಿನ್ ಛಾಯಾಗ್ರಹಣ, ಸಾಯಿ ಸರ್ವೇಶ್ ಸಂಗೀತ ನಿರ್ದೇಶನ ಚಿತ್ರಕ್ಕಿದೆ.

ಕವಿ, ಪದ್ಮಶ್ರೀ ಪುರಸ್ಕೃತ ಸಾಹಿತಿ ಡಾ.ದೊಡ್ಡರಂಗೇಗೌಡ ಅವರ ಭಾವ ಭಾಗೀರಥಿ ಹಾಗೂ ಗೀತ ಸರಸ್ವತಿ ಎಂಬ ಗೀತಗುಚ್ಚ ಬಿಡುಗಡೆ ಕಂಡಿದೆ..

ಕರ್ನಾಟಕ ರತ್ನ ಡಾ.ಪುನೀತ್ ರಾಜ್‍ಕುಮಾರ್ ಅವರ ನೆನಪಿನಲ್ಲಿ ಹೊರಬಂದಿರುವ ‘ಕೊಳಲು ನೀನಿರೇ….ಹಾಡು..’ ಎಂಬ ಹಾಡನ್ನು ಸಹ ಈ ಆಲ್ಬಂ ಒಳಗೊಂಡಿದೆ.

ಕನ್ನಡದ ಚಲನಚಿತ್ರ ಗೀತ ಸಾಹಿತ್ಯದಲ್ಲಿ ವಿಶೇಷ ಹೆಸರು ಮಾಡಿರುವ ದೊಡ್ಡರಂಗೇಗೌಡರು ಇಲ್ಲಿಯವರೆಗೂ 500ಕ್ಕೂ ಅಧಿಕ ಗೀತೆಗಳನ್ನು ರಚಿಸಿದ್ದಾರೆ. ಈಗ 20 ಗೀತೆಗಳಿರುವ ಭಾವ ಭಾಗೀರಥಿ ಎಂಬ ಗೀತ ಗುಚ್ಚವನ್ನು ಅಭಿನಂದನ್ ಆಡಿಯೋ ಮೂಲಕ ಪರಮ್ ಗುಬ್ಬಿ ಹೊರತಂದಿದ್ದಾರೆ. ಖ್ಯಾತ ಸಂಗೀತ ನಿರ್ದೇಶಕ ವಿ.ಮನೋಹರ್ ಈ ಆಲ್ಬಂಗಳಿಗೆ ಸಂಗೀತ ನೀಡಿದ್ದಾರೆ.

ಈ ಸಂಬಂಧ ನಡೆದ ಕಾರ್ಯಕ್ರಮದಲ್ಲಿ ಹಿರಿಯ ಕವಿ ಡಾ.ಎಚ್.ಎಸ್.ವೆಂಕಟೇಶಮೂರ್ತಿ ಅಧ್ಯಕ್ಷತೆ ವಹಿಸಿದ್ದರು. ಕನ್ನಡ ಅಭಿವೃದ್ದಿ ಪ್ರಾಧಿಕಾರದ ಅಧ್ಯಕ್ಷ ಟಿ.ಎಸ್. ನಾಗಾಭರಣ, ಡಾ.ಮಂಜುನಾಥ್, ರೇವಣಪ್ಪ,
ಶ್ರೀನಿವಾಸ್, ಸಂಗೀತ ನಿರ್ದೇಶಕ ವೀರಸಮರ್ಥ್, ಗಾಯಕರಾದ ಅಜಯ್ ವಾರಿಯರ್, ಬದ್ರಿಪ್ರಸಾದ್,
ಕಲಾವಿದರಾದ ಮಾಲತಿ ಶ್ರೀ, ಇಳಾ ವಿಟ್ಲಾ ಹಾಗೂ ಉಪಸ್ಥಿತರಿದ್ದರು. ಇದೇ ಸಂದರ್ಭದಲ್ಲಿ ಗೀತ ಸರಸ್ವತಿ ಆಲ್ಬಂ ಜೊತೆಗೆ ಹಸಿರು ಮೂಡಲಿ ಎಂಬ ಕೃತಿಯನ್ನು ಸಹ ಬಿಡುಗಡೆಗೊಳಿಸಲಾಯಿತು.

ಮೀನಾ ಹರೀಶ್ ನಿರ್ಮಾಣದಲ್ಲಿ ಹೊರಬಂದಿರುವ ಈ ಎರಡೂ ಆಲ್ಬಂಗಳಿಗೆ ಪರಮ್‌ಗುಬ್ಬಿ ನಿರ್ದೇಶನ ಮಾಡಿದ್ದಾರೆ. ವಿಶೇಷವಾಗಿ ಡಾ.ಪುನೀತ್ ರಾಜಕುಮಾರ್ ಭಾವಚಿತ್ರಗಳನ್ನು ಒಳಗೊಂಡ ಕೊಳಲು ನೀನಿರೇ, ದನಿಯು ನಾನಿರೇ ಎಂಬ ಸುಂದರ
ಗೀತೆಯೂ ಈ ಆಲ್ಬಮ್‌ನಲ್ಲಿದ್ದು, ಆ ಗೀತೆಯನ್ನು ಪುನೀತ್ ರಾಜ್ ಕುಮಾರ್ ಅವರಿಗೇ ಸಮರ್ಪಣೆ ಮಾಡಲಾಗಿದೆ.

ಕವಿ ಡಾ.ಎಚ್.ಎಸ್.ವೆಂಕಟೇಶ ಮೂರ್ತಿ ಅವರು ಡಾ.ದೊಡ್ಡರಂಗೇಗೌಡರ ಸಾಹಿತ್ಯ ಕೃಷಿ ಹಾಗೂ ಸಾಹಸಗಳ ಬಗ್ಗೆ ಮಾತನಾಡಿದರು.

ಮನಸ್ಸು ಮನಸ್ಸುಗಳ ನಡುವೆ ಹುಚ್ಚು ಕೋಡಿಯಂತೆ ಹರಿಯುವ ಪ್ರೇಮಕ್ಕೆ ಈಗ ಧಣಿವಾಗಿದೆಯೇ. ಹೀಗೊಂದು ಪ್ರಶ್ನೆ ಅಲ್ಲಲ್ಲಿ ಹುಟ್ಟುಕೊಳ್ಳಲು ಕಾರಣವಿದೆ. ಅದು ಬೋರಿಂಗ್ ಎಂಬ ಕ್ಷಣಿಕ ತೃಪ್ತಿಯ ಆಯಾಮ. ಹೌದು ಪ್ರೇಮದಾಟದಲ್ಲಿ ಬಹುಬೇಗನೆ ಸುಸ್ತು ಹೊಡೆಯುವ ಸಂದರ್ಭಗಳು ಸೃಷ್ಟಿಯಾಗುತ್ತಿವೆ. ಪ್ರೇಮದ ಗಾಢ ಅನುಭವ ಮತ್ತು ಅದರ ರೋಚಕತೆ ತಲುಪುವ ಮುನ್ನವೇ ಸಂಬಂಧಗಳು ಮುರಿದು ಬೀಳುತ್ತಿವೆ. ಹೀಗೇಕೆ..??

ಇದಕ್ಕೆ ಉತ್ತರ ಸರಳ ಆದರೂ ಕ್ಲಿಷ್ಟ. ಏಕೆಂದರೆ ಪ್ರೀತಿ ಪ್ರೇಮ ಮತ್ತು ಸಂಬಂಧ ಏನೆಂಬುದು ಅರಿವಾಗುವಷ್ಟರಲ್ಲಿ ಬ್ರೇಕ್ ಅಪ್ ಎಂಬುದು ಮೇಲೆರಗಿರುತ್ತದೆ. ಕಾಲವೊಂದಿತ್ತು; ಪ್ರೇಮ ಅಜರಾಮರಾ, ಪ್ರೇಮ ಮಧುರಾಕ್ಷರ ಎಂಬ ಕಲ್ಪನೆಗಳಿದ್ದವು. ಒಮ್ಮೆ ಪ್ರೇಮಾಂಕುರವಾದರೆ, ಅದನ್ನು ಬೆಳೆಸಿ ಪೊಷಿಸಿ ಸುಧೀರ್ಘ ಕಾಲದವರೆಗೂ ಪ್ರೇಮಸಹಿತ ಮನಸ್ಥಿತಿ ಹೊಂದುವುದು ಸಾಧ್ಯವಿತ್ತು. ಅಲ್ಲಿ ನೈಜತೆ ಮತ್ತು ನೈತಿಕತೆ ಎಂಬುದು ನಿಜವಾಗಿಯೂ ಇತ್ತು.

ಒಬ್ಬ/ಒಬ್ಬಳು ಪ್ರೀತಿಯಲ್ಲಿ ತೊಡಗಿದರೆ ಅದು ಶಾಶ್ವತ ಎಂಬುದು ತಲೆಯಲ್ಲಿ ಗಟ್ಟಿಯಾಗಿ ನೆಲೆಯೂರಿ ಇಬ್ಬರೂ ಬಿಟ್ಟಿರಲಾರದ ಮನಸ್ಥಿತಿಯನ್ನು ತಲುಪುತ್ತಿದ್ದರು. ಮಾತ್ರವಲ್ಲ; ಇಬ್ಬರೊಳಗೂ ಪರಸ್ಪರ ಅಪರ್ಣಾ ಭಾವ ಇದ್ದೇ ಇರುತಿತ್ತು. ಮುಖ್ಯವಾಗಿ ಪೂಜ್ಯ ಭಾವನೆಗಳು ನೆಲೆಸಿರುತ್ತಿದ್ದವು.

ಆದರೆ ಕಾಲ ವೇಗದ ಗತಿಯನ್ನು ಪಡೆದುಕೊಳ್ಳತೊಡಗಿದಂತೆ ಪ್ರೇಮರಾಹಿತ್ಯ ಭಾವನೆಗಳು ಮನಸ್ಸಿನಲ್ಲಿ ನೆಲೆಸತೊಡಗಿತು. ನಾನು ಎಂಬ ಅಹಂಮಿಕೆ ಕೂಡ ಹೆಚ್ಚಾಯಿತು. ಇಂತಹ ದಿನಗಳಲ್ಲಿಯೇ ಆಕರ್ಷಣೆ ಎಂಬುದು ಕವಲು ದಾರಿಯಾಯಿತು. ಮನಸ್ಸು ಅತಿತ್ತ ಹರಿಯ ಬಿಡಲು ಹೇರಳ ಅವಕಾಶವೂ ದೊರೆಯಿತು. ಆಗ ಪ್ರೇಮಕ್ಕೆ ತಿಲಾಂಜಲಿ ಇಡುವುದು ಸಾಮಾನ್ಯವೇ ಆಯಿತು.

ಈಗಂತೂ ಪ್ರೇಮಕ್ಕಿಂತಲೂ ಮುಂಚೆಯೇ ಸ್ನೇಹದ ಹಂತದಲ್ಲಿಯೇ ಲಿವ್ ಇನ್ ಸಂಬಂಧಗಳು ಆರಂಭವಾಗಿ ಪ್ರೇಮ ಆವರಿಸುವ ಮುಂಚೆಯೇ ಇಬ್ಬರಿಗೂ ಪರಸ್ಪರ ಬೋರ್ ಎನಿಸುವ ಸಂದರ್ಭಗಳು ಎದುರಾಗುತ್ತವೆ. ಅಲ್ಲಿ ಅಹಂಗೂ ಯೆಥೇಚ್ಚ ಜಾಗವಿರುವುದರಿಂದ ಸಂಬಂಧ ಬಹುಬೇಗನೆ ಢಮಾರ್ ಆಗುವುದುಂಟು.

ಸೆಕ್ಸ್ ಲೈಪ್ ನಲ್ಲಿ ರೋಚಕತೆ ಇನ್ನಷ್ಟು ಮತ್ತಷ್ಟು ದೊರಕಲಿ ಎಂಬ ಹುಚ್ಚಾಟಕ್ಕೆ ಬೀಳುವುದು ಈಗ ಸಾಮಾನ್ಯವೆನಿಸಿದೆ. ಇಲ್ಲಿ ಪ್ರೇಮವೇ ಅಪಹಾಸ್ಯಕ್ಕೆ ಒಳಗಾಗುವುದೂ ಉಂಟು.

ಒಂದು ಕಾಲದಲ್ಲಿ ಪ್ರೇಮ ಎಂಬುದು ಪವಿತ್ರ ಎಂದೇ ಭಾವಿಸಲಾಗುತಿತ್ತು. ಆಗ ದೈಹಿಕ ಸಂಬಂಧ ಏನಿದ್ದರೂ ಮದುವೆಯ ನಂತರ ಎಂಬುದಾಗಿತ್ತು. ಆದರೆ ಪ್ರೇಮದ ಸ್ವಾರ್ಥ ಮತ್ತು ತನ್ನದೆನ್ನುವ ವಾಂಛೆ ಇದ್ದೇ ಇತ್ತು. ಹಾಗಾಗಿ ಪ್ರೇಮ ಬಹು ಕಾಲ ಬಾಳುತಿತ್ತು. ಈಗ ಅದರ ಆಯುಸ್ಸು ಕಡಿಮೆ. ಏಕೆಂದರೆ ಪ್ರೇಮವನ್ನು ಪೋಷಿಸುವ ಮನಸ್ಸುಗಳು ಆತುರಕ್ಕೆ ಬಿದ್ದು ಸೊರಗುತ್ತಿವೆ.

ಹೀಗೂ ಒಂದು ಪ್ರಶ್ನೆ ಎದುರಾಗುತ್ತದೆ ಎಂದು ನಾನು ಭಾವಿಸಿರಲಿಲ್ಲ.. ಆದರೆ ಇರುವ ಕೆಲಸವೂ ಹೋಗಿ ಬರಿಗೈ ಆಗುತ್ತೇನೆ ಎಂಬುದನ್ನು ಸದಾ ಬೆನ್ನಿಗೆ ಕಟ್ಟಿಕೊಂಡಿರುತ್ತಿದ್ದೆ.

ಈ ಪತ್ರಿಕೋದ್ಯಮ ನಂಬಿಕೊಂಡ ಹೆಚ್ಚಿನ ಜನರಿಗೆ ಇದೇ ಆಗುತ್ತದೆ. ಅದರಲ್ಲೂ ಆದರ್ಶವೆಂಬ ಭ್ರಮೆಯನ್ನು ನಂಬಿಕೊಂಡರೆ ಮುಗಿದೇ ಹೋಯಿತು..ಎಷ್ಟೇ ಸಮರ್ಥನಿದ್ದರೂ ಎಲ್ಲಿಯೂ ಸಲ್ಲದೆ ಹೋಗುತ್ತಾನೆ. ಏಕೆಂದರೆ ಒಂದಷ್ಟು ಅಹಂ ಮೈಗೂಡಿರುತ್ತದೆ.. ಜೊತೆ ಪತ್ರಕರ್ತ ಎಂಬ ಕಿರೀಟ ಬೇರೆ ತಲೆಯ ಮೇಲೆಯೇ ಗಾಂಚಲಿ ಮಾಡಿಕೊಂಡಿರುತ್ತದೆ.

ಇದರ ಅರಿವು ಆಗುವಷ್ಟರಲ್ಲಿ ಕಾಲ ಮಿಂಚಿರುತ್ತದೆ.. ಒಂದಕ್ಕೆ ಅಂಟಿಕೊಳ್ಳುವಷ್ಟರಲ್ಲಿ ಇನ್ನೊಂದು ಕಳೆದು ಹೋಗಿರುತ್ತದೆ.. ಆದ್ದರಿಂದಲೇ ನಾನು ಸದಾ ಕಾಲವೂ ಎಲ್ಲದರಿಂದ ವಂಚಿತ ಎಂದೇ ಭಾವಿಸುತ್ತಿದ್ದೆ. This too will pass ಎಂದು ಸ್ಟೇಟಸ್ ನಲ್ಲಿ ಬರೆದುಕೊಳ್ಳುತ್ತಿದೆ. ಯಾವುದೇ ಇರಲಿ ಅರಿವಿಗೆ ಬರುವಷ್ಟರಲ್ಲಿ ಕಳೆದು ಹೋಗುತ್ತದೆ ಎಂದಾಗ ಬದುಕು ಏನಾಗುತ್ತದೆ.. ಅದು ಈ ಬೆಂಗಳೂರೆಂಬ ಬೆಂಗಳೂರಿನಲ್ಲಿ.. ದುಡಿಯುವ ಅರ್ಧಕ್ಕಿಂತಲೂ ಹೆಚ್ಚು ಬಾಡಿಗೆ ಮನೆಗೆ ಇಡಬೇಕು.. ಜೀವನ ವೆಚ್ಚವೂ ಅಧಿಕ.. ಎಷ್ಟೇ ಸರಳತೆಯ ವೇಷ ಹಾಕಿದರೂ ಬದುಕು ಕಟ್ಟಿಕೊಳ್ಳುವಲ್ಲಿ ಹಣದ ಮಹತ್ವ ಇದ್ದೇ ಇರುತ್ತದೆ.. ಸರಿ ಸಾಲ EMI ಎಲ್ಲವೂ ಇದ್ದೇ ಇರುತ್ತದೆ. ಅದೂ ಸುಮ್ಮನೆ ಬದುಕುವುದಕ್ಕಾಗಿ ಅವುಗಳ ಜೊತೆಗೆ ಹೊಡೆದಾಡುತ್ತಲೇ ಕಾಲ ಕಳೆಯುವಾಗ ಧುತ್ತನೆ ಮತ್ತೊಂದು ಆಘಾತದಂತೆ ಕೆಲಸ ಹೋಗಿರುತ್ತದೆ.. ಆಗ ಆಕಾಶವೇನು ಕಳಚಿ ಬೀಳುವುದಿಲ್ಲ.. ಮತ್ತೆ ಕೆಲಸಕ್ಕಾಗಿ ಹುಡುಕಾಟ ನಡೆಯುತ್ತದೆ.. ಆ ದಾರಿಯಲ್ಲಿ ಮತ್ತೊಂದಷ್ಟು ಸಾಲ ಅದೂ ಇದು.. ಇಂತಹ ಬದುಕು ಬಾಡಿಗೆ ಮನೆಯನ್ನೇ ಗಟ್ಟಿ ಮಾಡಿರುತ್ತದೆ. ಸ್ವಂತ ಮನೆ ಇರಲಿ ಒಂದು ಲೀಸ್ ಮನೆ ಕನಸು ಕಾಣುವುದಕ್ಕೂ ಅಸಾಧ್ಯ. ಇದು ಬೆಂಗಳೂರು.. ಹಾಗಾಗಿ ಬರೀ ಕನಸೆಂಬ ಕುದುರೆ ಏರಿ ಹೋರಾಡುವ ಜೀವನ.. ಇನ್ನು ದುಡಿದಿದ್ದು ಎಲ್ಲಿರುತ್ತದೆ.

ಈಚೆಗೆ ನಾನು ಕೆಲಸ ಕಳೆದುಕೊಂಡೆ ಎಂಬ ವಿಷಯ ತಿಳಿದಾಗ ಸಂಬಂಧಿಕರೊಬ್ಬರು ಕೇಳಿದರು.. ಇಲ್ಲಿಯವರೆಗೆ ದುಡಿದಿದ್ದನ್ನು ಏನ್ ಮಾಡ್ದಪ್ಪ.
ಅದು ಅವರ ತಪ್ಪಲ್ಲ ಮುಗ್ಧತೆ.. ನನ್ನದು ಅಸಹಾಯಕತೆ.. ಸಮಗ್ರವಾಗಿ ಬದುಕುವುದು ನಾಲ್ಕು ಹೆಸರು ಮಾಡುವುದು ಎಂಬುದೆಲ್ಲಾ ಭ್ರಮೆ ಎಂದು ಇನ್ನೂ ಅರ್ಥವಾಗಿಲ್ಲ ಎಂದರೆ ನಾವೆಷ್ಟು ಬುದ್ಧಿವಂತರು ಎಂಬುದನ್ನು ಯಾರಾದರೂ ಊಹಿಸಬಹುದು…

-ಸ್ನೇಹಪ್ರಿಯ