ರೇಟಿಂಗ್ : 3.5/5

ನಿರ್ಮಾಣ : ಡಾರ್ಲಿಂಗ್ ಕೃಷ್ಣ, ಮಿಲನಾ ನಾಗರಾಜ್

ನಿರ್ದೇಶನ : ಡಾರ್ಲಿಂಗ್ ಕೃಷ್ಣ

ಅಪ್ಪ-ಮಗಳ ಅಕ್ಕರೆಯ ಸಕ್ಕರೆಗೆ
ಭಾವನೆಗಳ ಮಾಧುರ್ಯ ಬೆಸುಗೆ..

ಒಂದೇ ಕಥೆಯ ಮುಂದುವರಿಕೆಯ ಭಾಗವನ್ನು (ಸೀಕ್ವೆಲ್) ಮತ್ತೆ ಮತ್ತೆ ಅಭಿವ್ಯಕ್ತಿಸುವುದು ಸುಲಭದ ವಿಷಯವಲ್ಲ; ಆದರೆ ಒಂದು ಲಯ ಕಂಡುಕೊಂಡ ಮೇಲೆ ಅದು ಕಷ್ಟವೂ ಅಲ್ಲ..

ಎಂದಿನಂತೆ ಹಿಂದಿನ ಭಾಗಗಳ ಮೆಲುಕು ಝಲಕ್ ಗಳ ನಡುವೆ ಆರಂವಾಗುವ ಕಥೆಯಲ್ಲಿ ತುಂಟುತನ ಮಿಶ್ರಿತ ವಾಗ್ಝರಿ ಕಾಣಿಸುತ್ತದೆ. ಇದು ಪ್ರೇಕ್ಷಕನನ್ನು ಕೊಂಚ ಕೊಂಚವೇ ಸೆಳೆಯುತ್ತ ಕೊನೆಗೆ ಭಾವನಾತ್ಮಕ ಅಂಚಿಗೆ ತಳ್ಳಿ ಬಿಡುತ್ತದೆ..

ಅಷ್ಟಕ್ಕೂ ಇದು ಅಪ್ಪ ಮಗಳ ಭಾವನಾತ್ಮಕ ಸಂಬಂಧದ ಕಥೆಯೇ..! ಸ್ನೇಹಿತ (ವಿಜು ಮಾಮ) , ಮನೆಯ ಕೆಲಸದ ಮನೆ ಒಡೆಯ( ಜಗು ಮಮ್ಮಿ) ಮತ್ತು ಶಾಲೆಯ ಟೀಚರ್, ಪ್ರಿನ್ಸಿಪಾಲ್ ಇವುಗಳ ತಮಾಷೆಯ ನಡುವೆ ಮೊದಲರ್ಧ ಮುಗಿದು ಹೋಗುತ್ತದೆ..

ಉತ್ತರಾರ್ಧದಲ್ಲಿ ಮಗುವಿನ ದತ್ತು ವಿಷಯ ನ್ಯಾಯಾಲಯದವರೆಗೂ ಬಂದು ಕೋರ್ಟ್ ಡ್ರಾಮ ಸಂಬಂಧಗಳ ನೆಲೆಯನ್ನು ಪ್ರಶ್ನಿಸುತ್ತಾ ಹೋಗುತ್ತದೆ. ಪ್ರಸಕ್ತ ಸನ್ನಿವೇಶದಲ್ಲಿ ಸಾಮಾಜಿಕ ನೆಲೆಯಲ್ಲಿ ಇರುವ ಸಮಕಾಲೀನ ಒತ್ತಡದ ಅಭಿವ್ಯಕ್ತಿ ಎದ್ದು ಕಾಣುತ್ತದೆ..

ಮದುವೆ ಮುಂಚೆ ಬರುವ ಲಿವ್ ಇನ್ ಸಂಬಂಧದಿಂದ ಮಗು ಜನಿಸುವುದರಿಂದ ಹಿಡಿದು ಕೆಲಸದ (ನರ್ಸ್) ನಿರ್ಲಕ್ಷ್ಯಕ್ಕೆ ಜೀವನವನ್ನೇ ಬಲಿ ಪಡೆಯುವ ವಿಷಯ. ನಂತರ ತಾಯಿ ಮಗುವಿಗಾಗಿ ಹಂಬಲಿಸುವಿಕೆ ಇವುಗಳ ನಡುವೆ. ಸಾಕು ಅಪ್ಪನ ನಿಷ್ಕಲ್ಮಶ ಪ್ರೀತಿ ಮತ್ತು‌ ಅದಮ್ಯ ನಂಬಿಕೆಯ ಸ್ಪಷ್ಟ ನಿಲುವುಗಳು ಪ್ರೇಕ್ಷಕನ ಹೃದಯವನ್ನು ಭಾರವಾಗಿಸುತ್ತವೆ.

ಮಗುವಿನ ಮುಗ್ಧ ನಿಲುವು, ಅಪ್ಪನ ಅಸಹಾಯಕತೆ, ಶಾಲೆಯ ಟೀಚರ್ ಮತ್ತು ಪ್ರಿನ್ಸಿಪಾಲ್ ಖಡಕ್ ನಿಲುವಿನ ಹಾಸ್ಯದ ಹೊನಲು ಪ್ರೇಕ್ಷಕ ಒಂದೆಳೆಯೂ ಕದಲದಂತೆ ಮಾಡುತ್ತದೆ.

ಕೋರ್ಟ್ ಸನ್ನಿವೇಶಗಳು ಈಗ್ಗೆ ಹತ್ತು ವರ್ಷಗಳ ಹಿಂದೆ ಬಂದಿದ್ದ ವಿಕ್ರಂ ಮುಖ್ಯ ಭೂಮಿಕೆಯಲ್ಲಿದ್ದ ತಮಿಳು ಚಿತ್ರ ‘ದೈವ ತಿರುಮಗಳ್’ ನೆನಪಿಗೆ ತರುತ್ತವೆ. ಆದರೆ ಇಲ್ಲಿ ಅಪ್ಪನ ಒಂಟಿತನ ಮತ್ತು ಗಟ್ಟಿತನದ ಭರವಸೆ ನೆಲೆಯಲ್ಲಿ ಚಿತ್ರವು ಸಾಗುತ್ತದೆ.

ಡಾರ್ಲಿಂಗ್ ಕೃಷ್ಣ ಎಂದಿನ ಸಹಜ ನಟನೆಯಲ್ಲೇ ಗಮನ ಸೆಳೆದರೆ, ಮಿಲನಾ ನಾಗರಾಜ್ ವಿದೇಶದಲ್ಲಿ ಸ್ಟೈಲೀಶ್ ರೂಪದಲ್ಲಿ ಬಂದು ಹಾಡಿನಲ್ಲಿ ಗಮನ ಸೆಳೆಯುತ್ತಾರೆ.

ವಿಜಯ ಪ್ರಕಾಶ್ ಹಾಡಿರುವ ಮುದ್ದು ಮಗಳೇ.. ಹಾಡು ಗಮನ ಸೆಳೆಯುತ್ತದೆ.. ಬಾಲನಟಿ ಸಂವೃತ ನಟನೆಯಲ್ಲಿ ಸೈ ಎನಿಸಿಕೊಳ್ಳುತ್ತಾಳೆ. ಕೋರ್ಟ್ ಸನ್ನಿವೇಶಗಳ ವೇಳೆ ನ್ಯಾಯಾಧೀಶರಾಗಿ ನಟಿಸಿರುವ (ನಿರ್ದೇಶಕ) ಬಿ.ಎಂ.ಗಿರಿರಾಜ್ ನಟನೆ ಗಮನ ಸೆಳೆಯುತ್ತದೆ. ದಿಲೀಪ್ ಹಾಗೂ ಶ್ವೇತಾ ಪ್ರಸಾದ್ ನಟನೆಯೂ ಗಮನಾರ್ಹ.

ಅಮೃತಾ ಅಯ್ಯಂಗಾರ್, ರಚೆಲ್ ಡೇವಿಡ್, ನಯೇರಾ, ಜಗದೀಶ್, ಅಭಿಲಾಶ್, ದಳಪತಿ ಮೊದಲಾದ ತಾರಾಗಣ ಮನರಂಜನಾತ್ಮ ನೆಲೆಯಲ್ಲಿ ಗಮನ ಸೆಳೆಯುತ್ತದೆ.

ಶ್ರೀ ಕ್ರೇಜಿ ಮೈಂಡ್ಸ್ ಛಾಯಾಗ್ರಹಣ ಮತ್ತು ಸಂಕಲನ, ನಕುಲ್ ಅಭಯಂಕರ್ ಸಂಗೀತ ಚಿತ್ರದ ಭಾವನಾತ್ಮಕ ಅಂಶಗಳಿಗೆ ಪೂರಕವಾಗಿದೆ.

* ಪ್ರೇಮಾ ಸಾಕ್ಷಿಯಾದ ಪೊಲೀಸ್ ಕಂಪ್ಲೆಂಟ್ ಟೀಸರ್ *

* ಪೊಲೀಸ್ ಕಂಪ್ಲೆಂಟ್ ನಲ್ಲಿ ವರಲಕ್ಷ್ಮೀ-ರಾಗಿಣಿ ಆ್ಯಕ್ಷನ್ *

ಇದು ಇಬ್ಬರು ಜನಪ್ರಿಯ ನಟಿಯರ ಆಕ್ಷನ್ ಥ್ರಿಲ್ಲರ್ ಸ್ಟೋರಿ ಇರುವ ಚಿತ್ರ. ಇದರ ಟೀಸರ್ ಬಿಡುಗಡೆ ಮಾಡಿದ್ದು ಮತ್ತೊಬ್ಬ ಜನಪ್ರಿಯ ನಟಿ ಪ್ರೇಮಾ..

ಕನ್ನಡದಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಮಹಿಳಾ ಪ್ರಧಾನ ಆ್ಯಕ್ಷನ್ ಚಿತ್ರಗಳ ಸಂಖ್ಯೆ ವಿರಳವಾಗಿದ್ದು. ಈಗ ಒಂದು ಚಿತ್ರ ಆ ಕೊರತೆ ತುಂಬುತ್ತಿದೆ. ಅದರ ಹೆಸರು ಪೊಲೀಸ್ ಕಂಪ್ಲೆಂಟ್..

ಕನ್ನಡದಲ್ಲಿ ಈ ಹಿಂದೆ ಪೂಜಾಗಾಂಧಿ ಅಭಿನಯದ ‘ಅನು’, ‘ದಂಡು’, ‘ಆಪ್ತ’ ಮೊದಲಾದ ಚಿತ್ರಗಳನ್ನು ನಿರ್ದೇಶಿಸಿದ್ದ ಸಂಜೀವ ಮೆಗೋಟಿ ಈ ಚಿತ್ರವನ್ನೂ ಸದ್ದಿಲ್ಲದೆ ನಿರ್ದೇಶನ ಮಾಡಿದ್ದು, ಎ.ಎ.ಎಸ್.ಕೆ ಪ್ರಮೀದಾಶ್ರೀ ಫಿಲಂಸ್ ಬ್ಯಾನರಿನಲ್ಲಿ ಈ ಚಿತ್ರ ನಿರ್ಮಾಣವಾಗಿದೆ.

ಇತ್ತೀಚೆಗಷ್ಟೇ ‘ಮಾರ್ಕ್’ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದ ನಟಿ ವರಲಕ್ಷ್ಮೀ ಶರತಕುಮಾರ್ ಹಾಗೂ ರಾಗಿಣಿ ದ್ವಿವೇದಿ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿರುವ ಈ ಚಿತ್ರದಲ್ಲಿ ನವೀನ್ ಚಂದ್ರ, ಕೃಷ್ಣ ಸಾಯಿ ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.

ಉಳಿದಂತೆ ರವಿಶಂಕರ್, ಶರತ್ ಲೋಹಿತಾಶ್ವ, ಅನಿಲ್ ರಾಜ್, ಸಪ್ತಗಿರಿ, ಪೃಥ್ವಿರಾಜ್, ಜೆಮಿನಿ ಸುರೇಶ್ ಹೀಗೆ ದೊಡ್ಡ ಕಲಾವಿದರ ತಾರಾ ಬಳಗವೇ ಚಿತ್ರದಲ್ಲಿದೆ.

ಚಿತ್ರವು ಬಿಡುಗಡೆಗೆ ಸಜ್ಜುಗೊಂಡಿರುವ ಸಂದರ್ಭದಲ್ಲಿ ಚಿತ್ರದ ಟೀಸರ್ ನ್ನು ಖ್ಯಾತ ನಟಿ ಪ್ರೇಮಾ ಬಿಡುಗಡೆಗೊಳಿಸಿದರು. ಚಿತ್ರದ ಮೊದಲ ಹಾಡನ್ನು ಕನ್ನಡ ಚಲನಚಿತ್ರ ನಿರ್ದೇಶಕರ ಸಂಘದ ಅಧ್ಯಕ್ಷ ಎನ್.ಆರ್.ಕೆ ವಿಶ್ವನಾಥ್ ಹಾಗೂ ನಿರ್ಮಾಪಕ ರಾಜಣ್ಣ ಬಿಡುಗಡೆಗೊಳಿಸಿ ಚಿತ್ರತಂಡಕ್ಕೆ ಶುಭ ಹಾರೈಸಿದರು.

ಇದೇ ವೇಳೆ ಮಾತನಾಡಿದ ಚಿತ್ರದ ನಿರ್ದೇಶಕ ಸಂಜೀವ್ ಮೆಗೋಟಿ, ಸುಮಾರು ಹತ್ತು ವರ್ಷದ ನಂತರ ಕನ್ನಡ ಚಿತ್ರರಂಗಕ್ಕೆ ಮತ್ತೆ ಬರುತ್ತಿರುವುದಕ್ಕೆ ಖುಷಿಯಾಗುತ್ತಿದೆ. ಇದೊಂದು ಆ್ಯಕ್ಷನ್ ಕಂ ಹಾರರ್-ಥ್ರಿಲ್ಲರ್ ಕಥಾಹಂದರದ ಸಿನಿಮಾ. ಮಾಡಿದ ಕರ್ಮ ಹೇಗೆ ಅವರವರನ್ನು ಕಾಡುತ್ತದೆ ಎಂಬ ಒಂದು ಎಳೆ ಈ ಸಿನಿಮಾವಾಗಿದೆ ಎಂದರು.

ಕನ್ನಡ ಮತ್ತು ತೆಲುಗಿನ ಸುಮಾರು 50ಕ್ಕೂ ಹೆಚ್ಚಿನ ಕಲಾವಿದರು ವಿವಿಧ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ಚಿತ್ರ ನಿರ್ಮಾಣವಾಗಿದ್ದು, ಏಕಕಾಲಕ್ಕೆ ಎರಡೂ ಭಾಷೆಗಳಲ್ಲೂ ಬಿಡುಗಡೆಗೊಳಿಸುವ ಯೋಜನೆಯಿದೆ ಎಂದರು ನಿರ್ದೇಶಕ ಸಂಜೀವ್ ಮೆಗೋಟಿ.

ತಮ್ಮ ಪಾತ್ರದ ಬಗ್ಗೆ ಮಾತನಾಡಿದ ನಟಿ ರಾಗಿಣಿ ದ್ವಿವೇದಿ, ಇದೊಂದು ವಿಭಿನ್ನ ಸಿನಿಮಾ. ಇದರಲ್ಲಿ ತಾಯಿ ಮತ್ತು ಮಗುವಿನ ಸಂಬಂಧದ ಸುತ್ತ ನನ್ನ ಪಾತ್ರ ಸಾಗುತ್ತದೆ. ಆ್ಯಕ್ಷನ್, ಹಾರರ್ ಜೊತೆಗೆ ಎಮೋಶನ್ಸ್ ಕೂಡ ಸಿನಿಮಾದಲ್ಲಿದೆ ಎಂದರು.

ಚಿತ್ರದ ಮೊದಲ ಗೀತೆಗೆ ಎಫ್.ಎಂ.ರೈನ್ ಬೋ ಆರ್.ಜೆ. ಸುಧೀಂದ್ರ (ಆರೋಹಣ ಖ್ಯಾತಿ) ಸಂಗೀತ ಸಂಯೋಜಿಸಿದ್ದು, ಬಿ. ಆರ್. ಛಾಯಾ ಈ ಗೀತೆಗೆ ಧ್ವನಿಯಾಗಿದ್ದಾರೆ. ಹರೀಶ್ ಸೊಂಡೇಕೊಪ್ಪ ಛಾಯಾಗ್ರಹಣ ಚಿತ್ರಕ್ಕಿದೆ.

* ಭಾರತ ಅಂತಾರಾಷ್ಟ್ರೀಯ ಸಿನಿಮಾ ಪ್ರವಾಸೋದ್ಯಮ ಸಮಾವೇಶ IIFTC ಪ್ರಶಸ್ತಿ *

* ಚಲವಾದಿ ಕುಮಾರ್ ನಿರ್ಮಾಣ, ನಾಗ್ ಶೇಖರ್ ನಿರ್ದೇಶನ *

ರೇಷ್ಮೆ ಬೆಳೆಗಾರರ ಸಂಕಷ್ಟ ಅಭಿವ್ಯಕ್ತಿ ಸಿದ ಚಿತ್ರವಾಗಿ ಗಮನ ಸೆಳೆದಿದ್ದ ನಾಗ್ ಶೇಖರ್ ನಿರ್ದೇಶನದ ‘ಸಂಜು ವೆಡ್ಸ್ ಗೀತಾ-2’ ಚಿತ್ರಕ್ಕೆ ಈ ವರ್ಷದ IIFTC ಟೂರಿಸಂ ಇಂಪ್ಯಾಕ್ಟ್ ಪ್ರಶಸ್ತಿ ಲಭಿಸಿದೆ.

ಪ್ರವಾಸೋದ್ಯಮವನ್ನು ಅಭಿವೃದ್ದಿಪಡಿಸುವ ನಿಟ್ಟಿನಲ್ಲಿ ಈ ಪ್ರಶಸ್ತಿ ನೀಡಲಾಗುತ್ತಿದ್ದು,
ಇತ್ತೀಚೆಗೆ ಮುಂಬೈನ ವೆಸ್ಟರ್ನ್ ಗಾರ್ಡನ್ ಸಿಟಿ ಹೋಟೆಲ್ ನಲ್ಲಿ ನಡೆದ ಈ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ನಿರ್ಮಾಪಕ ಚಲವಾದಿ ಕುಮಾರ್ ಹಾಗೂ ನಾಗ್‌ಶೇಖರ್ ಹಾಜರಿದ್ದು ಪ್ರಶಸ್ತಿ ಸ್ವೀಕರಿಸಿದರು.

ವಿವಿಧ ದೇಶಗಳ ನಿರ್ಮಾಪಕರು ಮತ್ತು ಇತರ ಗಣ್ಯರುಗಳು ಈ ಸಂದರ್ಭದಲ್ಲಿ ಭಾಗವಹಿಸಿದ್ದರು. ‘ಸಂಜು ವೆಡ್ಸ್ ಗೀತಾ-2’ ಚಿತ್ರದಲ್ಲಿ ಸ್ವಿಟ್ಜರ್ಲೆಂಡ್‌‌ ನ್ನು ಕ್ಲಾಸಿಕ್ ಮಾದರಿಯಲ್ಲಿ ಚಿತ್ರಿಸಿರುವುದು ಗಮನ ಸೆಳೆದಿರುವ ವಿಷಯವಾಗಿದೆ.

ಚಿತ್ರದಲ್ಲಿ ಬಳಸಿದ ಅದ್ಭುತ ಚಿತ್ರೀಕರಣ ಸ್ಥಳಗಳು ಈ ಗೌರವಕ್ಕೆ ಕಾರಣವಾಗಿವೆ. 2017ರಲ್ಲಿ IIFTC ಈ ಪ್ರಶಸ್ತಿಯನ್ನು ಆರಂಭಿಸಿದ್ದು 8ನೇ ವರ್ಷದ ಸಮಾರಂಭ ಇದಾಗಿದೆ.

ನಟ ಡಾರ್ಲಿಂಗ್ ಕೃಷ್ಣ ನೆಚ್ಚಿನ ‘ಲವ್ ಮಾಕ್ಟೇಲ್..’ ಸರಣಿಯ ಮೂರನೇ ಚಿತ್ರ ಯುಗಾದಿ ಹಬ್ಬ(ಮಾರ್ಚ್-19)ದಂದು ಬಿಡುಗಡೆಗೆ ಸಜ್ಜಾಗಿದ್ದು, ಚಿತ್ರದ ಪ್ರಿಮಿಯರ್ ಶೋ ಬುಕ್ಕಿಂಗ್ ಗೆ ಅತ್ಯುತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಈಗಾಗಲೇ ‘ಲವ್ ಮಾಕ್ಟೇಲ್-3’ ಚಿತ್ರದ ಟ್ರೈಲರ್ ಬಿಡುಗಡೆ ಕಂಡಿದ್ದು, ಈ ಕಥಾ ಸರಣಿಯ ಮೂರು ಅಂಶಗಳನ್ನು ಅದರಲ್ಲಿ ತೋರಿಸಲಾಗಿದೆ. ಆದರೆ ಕಥೆಯನ್ನು ಬಿಟ್ಟುಕೊಡದ ಆಶಯದಲ್ಲಿ ಮೂರನೇ ಭಾಗದ ಬಗ್ಗೆ ಹೆಚ್ಚಿನ ಬೆಳಕು ಟ್ರೈಲರ್ ಮೇಲೆ ಬೀಳಿಸಲಾಗಿಲ್ಲ.

ಈಚೆಗೆ ಮೂರನೇ ಆವೃತ್ತಿಯ ಈ ಟ್ರೈಲರ್ ನ್ನು ಡಾರ್ಲಿಂಗ್ ಕೃಷ್ಣ ಮತ್ತು ಮಿಲನಾ ನಾಗರಾಜ್ ಪುತ್ರಿ ಪರಿ ಬಿಡುಗಡೆಗೊಳಿಸಿದರು. ನಿರ್ದೇಶಕ ಹಾಗೂ ಈ ಚಿತ್ರಕ್ಕೊಂದು ಹಾಡನ್ನು ಬರೆದಿರುವ ಶಶಾಂಕ್ ಮತ್ತು ಕೆವಿಎನ್ ಪ್ರೊಡಕ್ಷನ್ಸ್ ಸಂಸ್ಥೆಯ ಸುಪ್ರೀತ್ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದರು.

ಚಿತ್ರದ ಆಶಯಗಳು ಮತ್ತು ಅದು ರೂಪುಗೊಂಡ ಬಗೆ ಹೇಗೆ ಎಂಬುದರ ವಿವರಣೆ ನೀಡಿದ ಡಾರ್ಲಿಂಗ್ ಕೃಷ್ಣ ಹಾಗೂ ಮಿಲನಾ ನಾಗರಾಜ್, ಈ ಚಿತ್ರದ ಬಿಡುಗಡೆಗೆ ದೊಡ್ಡ ಚಿತ್ರದ ಸಮಯ ಪೂರಕವಾಗಿ ಕೂಡಿ ಬಂದಿದ್ದರ ಬಗ್ಗೆ ಹರ್ಷ ವ್ಯಕ್ತಪಡಿಸಿದರು.

ಈ ಸಂದರ್ಭದಲ್ಲಿ ದಿಲೀಪ್ ರಾಜ್, ಶ್ವೇತಾ ಪ್ರಸಾದ್, ಅಮೃತಾ ಅಯ್ಯಂಗಾರ್, ಗೀತರಚನೆಕಾರ ರಾಘವೇಂದ್ರ ಕಾಮತ್, ನಟ ಜಗದೀಶ್, ರೆಚೆಲ್ ಡೇವಿಡ್, ಶ್ರೀ ಕ್ರೇಜಿ ಮೈಂಡ್ಸ್, ಸಂವೃತ, ಅಭಿಲಾಶ್, ರಜನಿ, ನಯಾರಾ ಮೊದಲಾದವರ ಹಾಜರಾತಿ ಇತ್ತು.

ಕ್ರಿಸ್‌ಮಿ ಬ್ಯಾನರಿನಡಿಯಲ್ಲಿ ಡಾರ್ಲಿಂಗ್ ಕೃಷ್ಣ ಮತ್ತು ಮಿಲನಾ ನಾಗರಾಜ್ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಡಾರ್ಲಿಂಗ್ ಕೃಷ್ಣ, ಮಿಲನಾ ನಾಗರಾಜ್, ಸಂವೃತ, ಅಮೃತಾ ಅಯ್ಯಂಗಾರ್, ದಿಲೀಪ್ ರಾಜ್, ಶ್ವೇತಾ ಪ್ರಸಾದ್, ರಚೆಲ್ ಡೇವಿಡ್, ನಯೇರಾ, ಜಗದೀಶ್, ಅಭಿಲಾಶ್, ಗಿರಿರಾಜ್, ದಳಪತಿ ಮುಂತಾದವರ ತಾರಾಗಣ ಈ ಚಿತ್ರಕ್ಕಿದೆ.

ಶ್ರೀ ಕ್ರೇಜಿ ಮೈಂಡ್ಸ್ ಛಾಯಾಗ್ರಹಣ ಮತ್ತು ಸಂಕಲನ, ನಕುಲ್ ಅಭಯಂಕರ್ ಸಂಗೀತ, ಅಮರ್ ಮತ್ತು ಜೋನಾ ಕಲಾ ನಿರ್ದೇಶನ ಮಾಡಿದ್ದಾರೆ.

* ರೇಣುಕಾಸ್ವಾಮಿ ಕೊಲೆ ಪ್ರಕರಣ ನೆನಪಿಸುವ ಟೀಸರ್ *

* ಮಿ.ನಟವರಲಾಲ್ ಚಿತ್ರ ತಂಡದ ಮತ್ತೊಂದು ಕೊಡುಗೆ *

ಇಲ್ಲಿ ‘ಬಾಸ್’ ಎಂದರೆ ಯಾರು..
ಅದು ಖಂಡಿತಾ ಡಿ ಬಾಸ್ ಇರಬಹುದೇ ಎಂಬ ಪ್ರಶ್ನೆಗಳ ಜೊತೆ ಚಿತ್ರತಂಡವನ್ನು ಮಾಧ್ಯಮದ ಪ್ರತಿನಿಧಿಗಳು ಜರಡಿಯಾಡಿಸಿ ಕೈ ಬಿಟ್ಟರು.

ಆದರೆ ಚಿತ್ರತಂಡ ಬೇರೆಯದನ್ನೇ ಸಮರ್ಥಿಸಿಕೊಂಡಿತು. ಇದೊಂದು ಕ್ರೈಮ್ ಕಥೆಗಳ ಕಥಾಗುಚ್ಛ ಎಂದರು ನಿರ್ದೇಶಕ ಲವ..

ಒಂದು ಕಾಲದಲ್ಲಿ ಪ್ರಪಂಚದ ವಿಸ್ಮಯವಾಗಿರುವ ತಾಜ್ ಮಹಲ್ ನ್ನೇ ಮಾರಾಟಕ್ಕಿಟ್ಟಿದ್ದ ಮಿ.ನಟವರಲಾಲ್ ಎಂಬ ಅಸಾಧ್ಯ ನಟೋರಿಯಸ್ ಬಗ್ಗೆ ಹಿಂದೆ ‘ಮಿ.ನಟವರಲಾಲ್’ ಎಂಬ ಚಿತ್ರ ಮಾಡಿದ್ದ ವೃತ್ತಿಯಲ್ಲಿ ವಕೀಲರಾಗಿರುವ ಲವ ಕಲ್ಪನೆಯ ಬಾಸ್ ಟೀಸರ್ ರೇಣುಕಾ ಸ್ವಾಮಿ ಕೊಲೆ ಪ್ರಕರಣದ ಮರು ಸೃಷ್ಟಿಯಂತೆ ಕಾಣುತ್ತದೆ.

ಏಕೆಂದರೆ ಪ್ರತಿ ಸನ್ನಿವೇಶ ಮತ್ತು ದೇಹ ಭಾಷೆ ಚಲನೆ ಎಲ್ಲವನ್ನೂ ಚಿತ್ರತಂಡ ಮರುಸೃಷ್ಟಿ ಮಾಡಿದೆ. ಆದರೆ ಇದರೊಳಗಿನ ಕಥೆಯೇ ಬೇರೆ ಎಂಬುದು ನಿರ್ದೇಶಕ ಲವ ಮತ್ತು ಮುಖ್ಯ ಪಾತ್ರ ಮಾಡಿರುವ ತನುಷ್ ಶಿವಣ್ಣ ಅವರ ಸಮರ್ಥನೆ.

ಸಿರಿ ಪ್ರೊಡಕ್ಷನ್ಸ್ ನಿರ್ಮಾಣದ, ವಿ.ಲವ ನಿರ್ದೇಶನದಲ್ಲಿ ತನುಷ್ ಶಿವಣ್ಣ ಮುಖ್ಯ ಪಾತ್ರದಲ್ಲಿ ನಟಿಸಿರುವ ‘ಬಾಸ್’ ಚಿತ್ರದ ಫಸ್ಟ್ ಲುಕ್ ಟೀಸರ್ ಬಿಡುಗಡೆಗೊಂಡು ತೀವ್ರ ಕುತೂಹಲವನ್ನು ಹುಟ್ಟುಹಾಕಿದೆ.

ಇದೊಂದು ಕ್ರೈಮ್ ಥ್ರಿಲ್ಲರ್ ಆಧಾರಿತ ಚಿತ್ರ. ಈಗಾಗಲೇ ಚಿತ್ರೀಕರಣ ಮುಕ್ತಾಯವಾಗಿದೆ. ಬೆಂಗಳೂರಿನ ಸುತ್ತಮುತ್ತ ಚಿತ್ರೀಕರಣ ನಡೆಸಲಾಗಿದೆ. ಮುಂದಿನ ತಿಂಗಳು ಚಿತ್ರವನ್ನು ತೆರೆಗೆ ತರುವ ಪ್ರಯತ್ನ ನಡೆಯುತ್ತಿದೆ. ತನುಷ್ ಶಿವಣ್ಣ ಅವರ ಜೊತೆ ಮೋನಿಕಾ ಗೌಡ ಹಾಗೂ ಪಾಯಲ್ ಚಂಗಪ್ಪ ಅಭಿನಯಿಸಿದ್ದಾರೆ ಎಂಬ ವಿವರಗಳನ್ನು ನೀಡಿದರು ನಿರ್ದೇಶಕರು.

ಅನಿಲ್ ಪಿ ನಿರ್ಮಾಣದ ಈ ಚಿತ್ರಕ್ಕೆ ‘ಸತ್ಯಮೇವ ಜಯತೇ’ ಎಂಬ ಅಡಿಬರಹವಿದೆ. ಡೆವಿ ಸುರೇಶ್ ಸಂಗೀತ ನಿರ್ದೇಶನ, ಶರತ್ ಎನ್ ಆರ್ ಪುರ ಛಾಯಾಗ್ರಹಣ ಹಾಗೂ ಮಹೇಶ್ ರೆಡ್ಡಿ ಸಂಕಲನ ಚಿತ್ರಕ್ಕಿದೆ.

ಕಲಾವಿದರಾದ ಡಾ.ವಿಜಯೇಶ್, ವೀರೇನ್ ಕೇಶವ್, ಭೀಷ್ಮ ರಾಮಯ್ಯ, ಲಕ್ಷ್ಮಣ್ ಪೂಜಾರಿ ಹಾಗೂ ತಂತ್ರಜ್ಞರು ಹಾಜರಿದ್ದು ತಮ್ಮ ಪಾತ್ರಗಳ ಬಗ್ಗೆ ವಿವರಣೆ ನೀಡಿದರು.

ಗುಣಾತ್ಮಕ ಚಲನ ಚಿತ್ರಗಳಿಗೆ ರಾಜ್ಯ ಸರ್ಕಾರದಿಂದ ನೀಡಲಾಗುವ ಸಹಾಯಧನವನ್ನು ಮತ್ತೆ ಮೂರು ವರ್ಷಗಳಿಗೆ ವಿಸ್ತರಿಸಿ ಅದಕ್ಕಾಗಿ 20 ಕೋಟಿ ಮೀಸಲಿರಿಸಲಾಗಿದೆ.

ಕಳೆದ ಕೆಲವು ವರ್ಷಗಳಿಂದ ನಿಂತು ಹೋಗಿದ್ದ ಸಹಾಯಧನವನ್ನು ಈಗಾಗಲೇ (2025-2026 ) ಮೂರು ವರ್ಷ ಅವಧಿಗೆ ಸರ್ಕಾರವು ನೀಡಿದ್ದು, ಮತ್ತೆ ಮೂರು ವರ್ಷದ ಚಲನ ಚಿತ್ರಗಳಿಗೆ ಸಹಾಯ ಧನ ನೀಡುವುದನ್ನು ವಿಸ್ತರಿಸಿ ಶುಕ್ರವಾರ ಬಜೆಟ್ ನಲ್ಲಿ ಘೋಷಣೆ ಮಾಡಲಾಗಿದೆ.

ಮುಂದಿನ ಮೂರು ವರ್ಷಗಳ ಗುಣಾತ್ಮಕ ಚಲನ ಚಿತ್ರಗಳಿಗೆ ಆಯ್ಕೆ ಪ್ರಕ್ರಿಯೆ ಪೂರ್ಣಗೊಳಿಸಿ ಸಹಾಯಧನ ನೀಡುವ ಕುರಿತು ಮುಖ್ಯಮಂತ್ರಿ ಸಿದ್ದರಾಮಯ್ಯ ಘೋಷಣೆ ಮಾಡಿದ್ದಾರೆ.

ಸಿನಿ ಮಿತ್ರ ಯೋಜನೆ

ರಾಜ್ಯದಲ್ಲಿ ಚಲನಚಿತ್ರ ಹಾಗೂ ಇತರೇ ಚಿತ್ರೀಕರಣಗಳಿಗೆ ಅಗತ್ಯವಿರುವ ವಿವಿಧ ಇಲಾಖೆಗಳ ಅನುಮತಿಗಳನ್ನು ಏಕಗವಾಕ್ಷಿ ವ್ಯವಸ್ಥೆಯಲ್ಲಿ ಒಂದೇ ವೇದಿಕೆಯಲ್ಲಿ ನೀಡುವ ಸಲುವಾಗಿ ‘ಸಿನಿ ಮಿತ್ರ’ ಎಂಬ ಆನ್ ಲೈನ್ ಡಿಜಿಟಲ್ ವ್ಯವಸ್ಥೆ ಜಾರಿಗೊಳಿಸಲು ಘೋಷಣೆ ಮಾಡಲಾಗಿದೆ.

ರಾಜ್ಯದ ಪ್ರವಾಸಿ ತಾಣಗಳು, ಐತಿಹಾಸಿಕ ಸ್ಮಾರಕಗಳು ಮತ್ತು ಚಿತ್ರೀಕರಣ ಸ್ಥಳಗಳ ಮಾಹಿತಿಯನ್ನು ಒಳಗೊಂಡ ‘ಕರ್ನಾಟಕ ಫಿಲ್ಮ್ ಲೊಕೇಶನ್ ಡಿಜಿಟಲ್ ಮ್ಯಾಪ್’ ನ್ನು ಒಂದು ಕೋಟಿ ರೂ. ವೆಚ್ಚದಲ್ಲಿ ಅಭಿವೃದ್ಧಿ ಪಡಿಸಲಾಗುವುದು ಎಂದು ತಿಳಿಸಲಾಗಿದೆ.

ಸರ್ಕಾರಿ ಚಲನಚಿತ್ರ ಮತ್ತು ದೂರದರ್ಶನ ಸಂಸ್ಥೆ ಹೆಸರುಘಟ್ಟದಲ್ಲಿ ನಡೆಸುತ್ತಿರುವ ಸೌಂಡ್ ರೆಕಾರ್ಡಿಂಗ್ ಮತ್ತು ಇಂಜಿನಿಯರಿಂಗ್ ಹಾಗೂ ಸಿನಿಮಾಟೋಗ್ರಫಿ ಕೋರ್ಸ್‌ಗಳಿಗೆ ಅಗತ್ಯವಿರುವ ಆಧುನಿಕ ಉಪಕರಣಗಳನ್ನು ಒದಗಿಸಲಾಗುವುದು ಎಂದೂ ಕೂಡ ಬಜೆಟ್ ಘೋಷಣೆಯಲ್ಲಿ ತಿಳಿಸಲಾಗಿದೆ.

ರೇಟಿಂಗ್ : 3.5/5

ನಿರ್ಮಾಣ : ಪದ್ಮ ಸಮೃದ್ಧಿ ಮಂಜುನಾಥ್

ನಿರ್ದೇಶನ : ರಘುಕುಮಾರ್ ಓ.ಆರ್

ವಿಕ್ಷಿಪ್ತ ಕಲ್ಪನೆ; ವಿನಾಶದ ನಮೂನೆ

ಮನುಷ್ಯನ ತಲೆ ಕತ್ತರಿಸಿ ಅದಕ್ಕೆ ಪ್ರಾಣಿಗಳ ತಲೆಯನ್ನು ಕಸಿ ಮಾಡಿ ಹೊಂದಿಸುವ ವಿಕ್ಷಿಪ್ತ ಕಲ್ಪನೆಯಲ್ಲಿ ತೇಲಾಡುವ (ಸೀತಿಯಲ್ ಕಿಲ್ಲರ್) ವೈದ್ಯಕೀಯ ವಿದ್ಯಾರ್ಥಿಯ ಹುಚ್ಚಾಟಗಳನ್ನು ಹತ್ತಿಕ್ಕಲು ಇರುವ ಅವತಾರ ಪುರುಷನೇ ಅರ್ಜುನ್ (ಹಯಗ್ರೀವ)..

ಕಸದ ರಾಶಿಯ ನಡುವೆ ಹಂದಿ ತಲೆ ಇರುವ ಮೃತ ದೇಹವೊಂದು ಸಿಗುತ್ತದೆ. ಬಳಿಕ ಕುದುರೆ, ಎಮ್ಮೆ ತಲೆ ಮತ್ತೆ ಗಣೇಶನಂತೆ ಆನೆ ತಲೆ ಇರುವ ಮೃತ ದೇಹಗಳು ಪತ್ತೆಯಾಗುತ್ತವೆ..

ಪೊಲೀಸ್ ಇಲಾಖೆಗೆ ಸವಾಲಾಗುವ ಈ ಪ್ರಕರಣವನ್ನು ಇನ್ನೂ ಸಬ್ ಇನ್ಸ್ ಪೆಕ್ಟರ್ ಆಗಿರುವ ಅರ್ಜುನ್ ಭೇದಿಸಲು ಹೊರಡುವುದು ಮತ್ತು ಆ ಸವಾಲು ಕ್ಷಣ ಕ್ಷಣಕ್ಕೂ ಉದ್ವೇಗಗೊಳಿಸುವುದು ಮತ್ತು ಅದೇ ಕಾರಣಕ್ಕೆ ಕುತೂಹಲ ಹೆಚ್ಚಿಸುವುದು ಚಿತ್ರದ ಮುಖ್ಯಾಂಶ.

ಆದರೆ ಇದರ ಸೂತ್ರಧಾರ ಒಬ್ಬ ವಿಕೃತ ಮನಸ್ಥಿತಿ ಇರುವ ವೈದ್ಯಕೀಯ ವಿದ್ಯಾರ್ಥಿ ಮತ್ತು ಹ್ಯಾಕಿಂಗ್ ಪರಿಣಿತ. ಹಾಗಾಗಿ ಆತನ ಜಾಡನ್ನು ಹಿಡಿಯುವುದು ಸುಲಭವಲ್ಲ; ಹಾಗಾಗಿ ಇಲ್ಲಿ ಪೊಲೀಸ್ ವ್ಯವಸ್ಥೆ ಮತ್ತು ಅರ್ಜನ್ ನ ಬ್ರೇನ್ ಹೆಚ್ಚು ಕೆಲಸ ಮಾಡುತ್ತದೆ.

ಓದುವ ಕಾಲದಲ್ಲಿಯೇ ಹೃದಯದ ಕಸಿ ಮಾದರಿಯಲ್ಲಿ ತಲೆ ಮತ್ತು ದೇಹ ಹೊಂದಿಸುವ ಕಸಿ ಏಕೆ ಮಾಡಬಾರದು ಎಂದು ಪ್ರಶ್ನಿಸುವ ಖಳನಿಗೆ ಭಾರತೀಯ ಪುರಾಣದಲ್ಲಿ ವಿಷ್ಣುವಿನ ನರಸಿಂಹ, ವರಾಹ, ಹಯಗ್ರೀವ ಹಾಗೂ ಗಣೇಶನ ಬೇರೆ ತಲೆಯ ಅವತಾರಗಳು ಕೆಣಕುತ್ತವೆ. ಅದೇ ರೀತಿ ಪ್ರಯೋಗಗಳನ್ನು ಮಾಡಲು ಆತ ಹಿಡಿಯುವ ವಾಮ ಮಾರ್ಗದಿಂದ ಯಥೇಚ್ಛ ಕೊಲೆಗಳು ನಡೆಯುತ್ತವೆ.

ಪೊಲೀಸ್ ಅಧಿಕಾರಿ ಅರ್ಜುನ್ ಸಾಮಾನ್ಯನಲ್ಲ; ಆತನಿಗೆ ಅಶ್ವಿನ್ ಎಂಬ ಸಹಾಯಕ ಅಧಿಕಾರಿ ಬೆಂಬಲವೂ ಇರುತ್ತದೆ. ಹಾಗಾಗಿ ಪೊಲೀಸ್ ವ್ಯವಸ್ಥೆಯ ಸಮರ್ಪಕ ಬಳಕೆಯಿಂದ ಎಲ್ಲವನ್ನು ಬೇಧಿಸುತ್ತಾನೆ. ಮುಖ್ಯವಾಗಿ ಆ ವಿಕೃತ ಮನುಷ್ಯ ಅರ್ಜುನ್ ಕುಟುಂಬದ ವಿಷಯಕ್ಕೆ ಕೈ ಹಾಕಿ ಅವಸಾನವನ್ನು ಮೇಲೆಳೆದುಕೊಳ್ಳುತ್ತಾನೆ.

ಇಲ್ಲಿ ಅಚ್ಚರಿ ಕಾಡುವುದು ಕೆಳ ಹಂತದ ಅಧಿಕಾರಿ ದೊಡ್ಡದಾಗಿ ಕೆಲಸ ಮಾಡುವುದು. ಆ ಅಧಿಕಾರಿಗೆ ಇನ್ನೂ ಹೆಚ್ಚಿನ ಪವರ್ ಬೇಕಿರುತ್ತದೆ ಎಂಬುದು ಪ್ರೇಕ್ಷಕನಿಗೇ ಅನಿಸುತ್ತ ಹೋಗುತ್ತದೆ. ಆದೇಶ ನೀಡುವಷ್ಟು ಅಧಿಕಾರವಿಲ್ಲದ ಅಧಿಕಾರಿ ಕೈಗೆ ದೊಡ್ಡ ಜವಾಬ್ದಾರಿ ವಹಿಸುವ ಕಮಿಷನರ್ ಕೂಡ ಇಲ್ಲಿ ಗಮನ ಸೆಳೆಯುತ್ತಾರೆ.

ಕ್ಷಣ ಕ್ಷಣಕ್ಕೂ ಕುತೂಹಲ ಕೆರಳಿಸು ಕಥೆಯ ವೇಗಕ್ಕೆ ಬೆಂಬಲವಾಗಿ ನಿಲ್ಲುವುದು ಜ್ಯೂಡೋಸ್ಯಾಂಡಿ ಅವರ ಹಿನ್ನೆಲೆ ಸಂಗೀತ ಮತ್ತು ಗಿರೀಶ್ ಆರ್.ಗೌಡ ಛಾಯಾಗ್ರಹಣ. ಕೆ.ಎಂ.ಪ್ರಕಾಶ್ ಸಂಕಲನವೂ ವೇಗಕ್ಕೆ ಸಹಕರಿಸಿದೆ.

ಖಡಕ್ ಪೊಲೀಸ್ ಅಧಿಕಾರಿ ಪಾತ್ರದಲ್ಲಿ ಧನ್ವೀರ್ ಗೌಡ ಲೀಲಾಜಾಲವಾಗಿ ನಟಿಸಿದ್ದಾರೆ. ‘ಐ ಯಾಮ್ ದಿ ಸೂಪರ್ ಬ್ರಹ್ಮ’ ಎಂದು ಅಬ್ಬರಿಸುವ ಸುನೀಲ್ ರಾವ್ ವರಸೆ ಆ ಪಾತ್ರಕ್ಕೆ ಅದ್ಭುತ.

ಆದರೆ ಅಷ್ಟೊಂದು ರಕ್ತಪಾತ, ಹಿಂಸೆ ನೋಡಲು ಎಲ್ಲರಿಗೂ ಸಾಧ್ಯವಾಗುವುದಿಲ್ಲ ಎಂಬುದು ಚಿತ್ರದ ನಕಾರಾತ್ಮಕ ಅಂಶ.

ಸಂಜನಾ ಆನಂದ್, ಅಶ್ವಿನ್ ಹಾಸನ ಹಾಗೂ ಅಶ್ವಿನಿಗೌಡ ಅವರು ತಮಗೆ ದಕ್ಕಿರುವ ವಿಶೇಷ ಅವಕಾಶಗಳಲ್ಲಿ ಮಿಂಚಿದ್ದಾರೆ. ಇನ್ನುಳಿದಂತೆ ರಮೇಶ್ ಭಟ್, ಸಾಧುಕೋಕಿಲ, ಶರತ್ ಲೋಹಿತಾಶ್ವ , ಶೊಭ್ ರಾಜ್, ಗಿಲ್ಲಿ ನಟ ಅವರ ಪಾತ್ರಗಳು ಚಿತ್ರಕ್ಕೆ ಪೂರಕವಾಗಿವೆ.

ರೇಟಿಂಗ್ : 3.5/5

ನಿರ್ಮಾಣ : ಜಿ.ಉಮೇಶ್

ನಿರ್ದೇಶನ : ವಿಜಯಾನಂದ್

ಆಗಸಕ್ಕೆ ತೆರೆದಿಟ್ಟ ಪಯಣ..

ಇದೊಂದು ಮಿಕ್ಕಿ ಮೌಸ್ ಮಾದರಿಯ ಕಥೆ; ಒಂದಕ್ಕೊಂದು ಸಂಬಂಧ ಮತ್ತು ಸಂಪರ್ಕವಿದ್ದರೂ ಯಾವುದೂ ಕೈಗೆ ನಿಲುಕುವುದಿಲ್ಲ.

ಒಂದು ಸುಂದರವಾದ ಕಾರು. ಅದರಲ್ಲಿ ಅಹಲ್ಯ, ಸತ್ಯ ಮತ್ತು ಭೂಪತಿಯ ಪಯಣ.. ದಾರಿಯಲ್ಲಿ ಸಿಗುವ ಮದುವೆ ಜೋಡಿ ಮತ್ತು ದಿಬ್ಬಣ..

ಅಸಾಧ್ಯ ಮಾತುಗಾರ ಭೂಪತಿ, ಕುಳಿತಲ್ಲೇ ರೀಲ್ಸ್ ಕಥೆ ಕಟ್ಟುವ ಸತ್ಯ ಹಾಗೂ ಇಬ್ಬರಿಗೂ ಚಮಕ್ ನೀಡುವ ಅಪ್ಸರ ಮೂವರನ್ನು ಹೊತ್ತ ಕಾರು ಮತ್ತು ಕಣ್ಣಿಗೆ ಹಬ್ಬ ನೀಡುವ ಪ್ರಕೃತಿಯ ವಿಹಂಗಮ ನೋಟ (ವೈಮಾನಿಕ ಚಿತ್ರಣ) ಎಲ್ಲವೂ ಸೊಗಸು.

ಆದರೆ ಕೆಲವೊಮ್ಮೆ ಯಥೇಚ್ಛ ರೀಲ್ಸ್ ನ ಮಾತುಗಳು ಕೈಯಲ್ಲಿ‌ ಮೊಬೈಲ್ ಹಿಡಿದು ನೋಡಿದ ಅನುಭವ. ಒಂದು ಕೊಲೆ ಅದನ್ನು ಸೆರೆ ಹಿಡಿದು ಬಚ್ಚಿಟ್ಟುಕೊಂಡಿರುವ ಪೆನ್ ಡ್ರೈವ್. ಅದರ ಹುಡುಕಾಟದಲ್ಲಿ ಬಿಚ್ಚಿಕೊಳ್ಳುವ ಎಲ್ಲರ ಕಥಾನಕ ಕುತೂಹಲವೇ..

ಬ್ರೇನ್ ಲೆಸ್ ಕಾಮಿಡಿ ವರಸೆಯಲ್ಲಿ ಸಾಗುವ ಪರಿಯಲ್ಲಿ ಮಿಕ್ಕಿ ಮೌಸ್ ಆಟವೇ ಪ್ರಧಾನ. ಈ ನಡುವೆ ನಿರ್ದೇಶಕ ವಿಜಯಾನಂದ್ ಹಾಗೂ ಅವರ ಸಹೋದರ ಡಾ.ವಿ.ನಾಗೇಂದ್ರ ಪ್ರಸಾದ್ ಕಾಮಿಡಿ ಡಾನ್ ಮಾದರಿಯಲ್ಲಿ ಅಬ್ಬರಿಸಿ ಹೋಗುವುದೂ ತಮಾಷೆ..

ಸತ್ಯ ಮತ್ತು ಭೂಪತಿ ಸೀರಿಯಸ್ ಬದುಕನ್ನು ಕಾಮಿಡಿ ಮಾಡಿಕೊಂಡವರು. ಅಪ್ಸರಾ ಕೂಡ ಅದೇ ನೆಲೆಯಲ್ಲಿ ಸಾಗುವುದರಿಂದ ಎಲ್ಲಾ ತಿರುವು ಮತ್ತು ಘಟನೆಗಳು ತಮಾಷೆಯಾಗಿಯೇ ಕಾಣುತ್ತವೆ.

ಕಳ್ಳ ಪೊಲೀಸ್ ಆಗಿ ಬರುವ ಗೋವಿಂದೇಗೌಡ ಮತ್ತು ಪ್ರಮೋದ್ ಶೆಟ್ಟಿ ಅವರ ಪಾತ್ರವೂ ಸೀರಿಯಸ್ ಅಲ್ಲ. ಕೊನೆಗೆ ಸಾಧು ಪ್ರವೇಶ ಕೂಡ ತಮಾಷೆಯೇ..

ಪ್ರತಿ ಘಟನೆ ಬಿಚ್ಚಿಕೊಳ್ಳುವ ರೀತಿಯಿಂದಲೇ ಕುತೂಹಲ ಕೆರಳಿಸುವ ಸಂದರ್ಭದಲ್ಲಿ ಗಿಲ್ಲಿ ನಟ ಹಾಗೂ ಗೌರವ್ ಶೆಟ್ಟಿ ಮಾತುಗಳು ಕಚಗುಳಿ ಇಡುತ್ತವೆ. ಶ್ವೇತ ಕೆಲವೊಮ್ಮೆ ಕಾಮಿಡಿ ಮತ್ತು ಕೆಲವೊಮ್ಮೆ ಸೀರಿಯಸ್.

ಸುಮ್ಮನೆ ಕುಳಿತು ನಕ್ಕು ಹಗುರಾಗಲು ಪೂರಕ ಈ ಸಿನಿಮಾ. ಎಲ್ಲಾ ಪಾತ್ರಗಳು ನಗುವಿನ ಬುಗ್ಗೆ ಹರಿಸದಿದ್ದರೂ ಒಳಗೆ ನಗುವಿನ ಲಹರಿಯನ್ನು ಹರಿಸುತ್ತವೆ.

ಸಾಹಿತಿ ಹೃದಯ ಶಿವ ವಿಶೇಷ ಪಾತ್ರದಲ್ಲಿ ಗಮನ ಸೆಳೆದರೆ, ಡ್ರ್ಯಾಗನ್ ಮಂಜು, ಸೀನು ಭಾಯ್, ನಾಗವರ್ಧನ್, ಗಿರೀಶ್ ಶಿವಣ್ಣ, ಟಿನ್ನಿಸ್ ಕೃಷ್ಣ, ಕರಿಸುಬ್ಬು, ವಂಶಿ, ಮಂಜಣ್ಣ, ಬಿ.ಎನ್ ಮಂಗಳ, ಮಂಗಳೂರು ಮೀನನಾಥ ಅವರ ಪಾತ್ರಗಳೂ ನಗುವಿಗೆ ಪೂರಕ.

ಆರ್.ಡಿ ನಾಗಾರ್ಜುನ ಛಾಯಾಗ್ರಹಣ, ಶ್ರೀಕಾಂತ್ ಸಂಕಲನ, ವಿ ನಾಗೇಂದ್ರ ಪ್ರಸಾದ್ ಸಾಹಿತ್ಯ ಮತ್ತು ಸಂಗೀತ ನಿರ್ದೇಶನ ಈ ಚಿತ್ರಕ್ಕೆ ಪೂರಕ.

* ಮಹಾ ಭಾರತದ ಪಾತ್ರವೇ ಪ್ರೇರಣೆ *

ಶಿಖಂಡಿಯನ್ನು ಅಡ್ಡ ತಂದರೆ ಆಚಾರ್ಯ ಭೀಷ್ಮ ಶಸ್ತ್ರ ಹಿಡಿಯುವುದಿಲ್ಲ; ಮಹಾ ಭಾರತದ ಅತ್ಯಂತ ಪ್ರಭಾವೀ ಸನ್ನಿವೇಶ ಇಲ್ಲಿ ಚಿತ್ರವಾಗಿದೆ..

ಅದೇ ಶಿಖಂಡಿ..!

ಈ ಹಿಂದೆ ‘ಮಾರಕಾಸ್ತ್ರ’ ಎಂಬ ಚಿತ್ರವನ್ನು ನಿರ್ದೇಶಿಸಿದ್ದ ಗುರುಮೂರ್ತಿ ವಿ (ಗುರುಮೂರ್ತಿ ಸುನಾಮಿ) ಈಗ ವಿಭಿನ್ನ ಕಥಾಹಂದರ ಹೊಂದಿರುವ ‘ಶಿಖಂಡಿ’ ಎಂಬ ಚಿತ್ರವನ್ನು ನಿರ್ದೇಶಿಸಿದ್ದಾರೆ.

ಪೋಲಾ ಪ್ರವೀಣ್ ಕುಮಾರ್ ಪೋಲಾ ಮೂವೀಸ್ ಮೂಲಕ ಈ ಚಿತ್ರವನ್ನು ನಿರ್ಮಿಸಿದ್ದು, ಸೋಮವಾರ ಚಿತ್ರದ ಮೋಷನ್ ಪೋಸ್ಟರ್ ಬಿಡುಗಡೆ ಮಾಡಲಾಗಿದೆ.

ನಿರ್ಮಾಪಕ ಸಂಜಯ್ ಗೌಡ ಹಾಗೂ ನಿರ್ದೇಶಕರಾದ ಜಡೇಶ್ ಕೆ ಹಂಪಿ, ನವೀನ್ ರೆಡ್ಡಿ ‘ಶಿಖಂಡಿ’ ಚಿತ್ರದ ಮೋಷನ್ ಪೋಸ್ಟರ್ ಅನಾವರಣ ಮಾಡಿ ಚಿತ್ರತಂಡಕ್ಕೆ ಶುಭ ಕೋರಿದರು.

ಮಹಾಭಾರತದಲ್ಲಿ ಶಿಖಂಡಿ ಪುನರ್ಜನ್ಮ ಪಡೆದು ತನ್ನ ಸೇಡನ್ನು ತೀರಿಸಿಕೊಳ್ಳುವುದು ಪುರಾಣದಲ್ಲಿದೆ. ಈ ಅಂಶವನ್ನೇ ಪ್ರಧಾನವಾಗಿಸಿ ಈ ಚಿತ್ರದ ಕಥೆ ಹೆಣೆಯಲಾಗಿದೆ. ಸಸ್ಪೆನ್ಸ್, ಥ್ರಿಲ್ಲರ್, ಹಾರಾರ್, ಕಾಮಿಡಿ ಸೇರಿದಂತೆ ಎಲ್ಲಾ ಅಂಶಗಳು ಇರುವ ಕೌಟುಂಬಿಕ ಕಥಾಹಂದರ ಹೊಂದಿರುವ ಚಿತ್ರವಿದು ಎಂಬ ವಿವರಣೆ ನೀಡಿದರು ನಿರ್ದೇಶಕ ಗುರುಮೂರ್ತಿ ವಿ.

ಕಥೆ ಕೇಳಿದ ತಕ್ಷಣ ಮೆಚ್ಚಿಕೊಂಡ ನಿರ್ಮಾಪಕ ಪೋಲಾ ಪ್ರವೀಣ್ ಕುಮಾರ್ ಚಿತ್ರದ ನಿರ್ಮಾಣಕ್ಕೆ ಮುಂದಾದರು. ತಂತ್ರಜ್ಞರ ಹಾಗೂ ಕಲಾವಿದರ ಸಹಕಾರದಿಂದ ಚಿತ್ರ ಉತ್ತಮವಾಗಿ ಮೂಡಿಬಂದಿದೆ. ಚಿತ್ರೀಕರಣ ಮುಗಿದಿದೆ. ಮೋಷನ್ ಪೋಸ್ಟರ್ ಬಿಡುಗಡೆಯಾಗಿದೆ. ಮೇ ವೇಳೆಗೆ ಸಿನಿಮಾ ಬಿಡುಗಡೆ ಮಾಡುವ ಯೋಜನೆ ಇದೆ ಎಂದರು.

ಬಳ್ಳಾರಿ ಮೂಲದ ನನಗೆ ಚಿತ್ರ ಮಾಡಲು ಎರಡು ಕಾರಣ. ಒಂದು ಕಥೆ . ಮತ್ತೊಂದು ವಿಶೇಷ ಚೇತನರಾಗಿದ್ದರೂ ನಿರ್ದೇಶಕ ಗುರುಮೂರ್ತಿ ಅವರಿಗೆ ಸಿನಿಮಾ ಮೇಲಿರುವ ಪ್ರೀತಿ. ಹಾಗಾಗಿ ಒಂದೊಳ್ಳೆ ಚಿತ್ರ ನಿಮ್ಮ ಮುಂದೆ ಬರುತ್ತಿದೆ ಎಂದರು ನಿರ್ಮಾಪಕ ಪೋಲಾ ಪ್ರವೀಣ್.

ಮೈಸೂರು ಮೂಲದ ಯುವರಾಜ್ ಗೌಡ ಮುಖ್ಯ ಪಾತ್ರದಲ್ಲಿದ್ದು, ಅವರ ಎದುರು ಖ್ಯಾತಿ ನಟಿಸಿದ್ದಾರೆ. ನಟಿಯರಾದ ನಿಖಿತಾ ಸ್ವಾಮಿ, ನೀತು, ಚಾಂದಿನಿ ತಮ್ಮ ಪಾತ್ರಗಳ ವಿವರ ನೀಡಿದರು.

ಹಿರಿಯ ಕಲಾವಿದರಾದ ರಘು ರಾಮನಕೊಪ್ಪ, ದೀಪಕ್ ಶೆಟ್ಟಿ, ವಿಜಯ್ ಚಂಡೂರ್ ತಮ್ಮ ಪಾತ್ರದ ಬಗ್ಗೆ ಮಾಹಿತಿ ನೀಡಿದರು.

ಛಾಯಾಗ್ರಾಹಕ ಸ್ವಾಮಿ, ಸಂಗೀತ ನಿರ್ದೇಶಕ ಮಂಜುಕವಿ, ಹಾಡು ಬರೆದಿರುವ ಕಿನ್ನಾಳ್ ರಾಜ್, ಹಿನ್ನೆಲೆ ಸಂಗೀತ ನೀಡಿರುವ ಪ್ರದ್ಯೋತನ್, ನೃತ್ಯ ನಿರ್ದೇಶಕ ಜಗ್ಗು ಮಾಸ್ಟರ್ ಹಾಗೂ ಚಿತ್ರಕಥೆ ಬರೆದಿರುವ ದಯಾಶಂಕರ್ ಹಾಜರಿದ್ದರು.

ಧನ್ವೀರ್ ಮುಖ್ಯ ಪಾತ್ರದಲ್ಲಿರುವ
ಪುರಾಣದ ಕಥೆಯ ಪ್ರೇರಣೆ ಹೊಂದಿರುವ ‘ಹಯಗ್ರೀವ’ ಇದೇ ವಾರ ಬಿಡುಗಡೆ ಕಾಣುತ್ತಿದೆ.

ಕೆ.ವಿ.ಸಿ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ಪದ್ಮ ಸಮೃದ್ಧಿ ಮಂಜುನಾಥ್ ನಿರ್ಮಿಸಿರುವ, ರಘುಕುಮಾರ್ ಓ.ಆರ್ ನಿರ್ದೇಶನದ ಚಿತ್ರವೀಗ ಬಿಡುಗಡೆಯ ಹಾದಿಯಲ್ಲಿದೆ.

ಇತ್ತೀಚೆಗಷ್ಟೇ ಬಿಡುಗಡೆಯಾಗಿರುವ ಚಿತ್ರದ ಟ್ರೈಲರ್ ಗೆ ಮೆಚ್ಚುಗೆಯ ಮಹಾಪೂರವೇ ಹರಿದು ಬರುತ್ತಿದ್ದು, ಈ ಕುರಿತು ಹೆಚ್ಚಿನ ಮಾಹಿತಿ ನೀಡಲು ಚಿತ್ರತಂಡ ಮಾಧ್ಯಮಗಳ ಮುಂದೆ ಬಂದಿತ್ತು..

ರಘು ಕುಮಾರ್ ನಿರ್ದೇಶನ ಮಾಡಿದ್ದ ಕಿರುಚಿತ್ರ ಇಷ್ಟವಾಗಿ ಅವರಿಂದ ಈ ಚಿತ್ರದ ನಿರ್ದೇಶನ ಮಾಡಿಸಲಾಗಿದೆ. ಇದು ನಮ್ಮ ಸಂಸ್ಥೆಯ ಮೂರನೇ ಚಿತ್ರ ಎಂದು ವಿವರ ನೀಡಿದರು ನಿರ್ಮಾಪಕ ಸಮೃದ್ಧಿ ಮಂಜುನಾಥ್.

ದರ್ಶನ್ ಅವರ ಮೂಲಕ ಧನ್ವೀರ್ ಅವರ ಪರಿಚಯವಾಯಿತು. ಧನ್ವೀರ್ ಸೇರಿದಂತೆ ಎಲ್ಲಾ ಕಲಾವಿದರ ಅಭಿನಯ ಹಾಗೂ ತಂತ್ರಜ್ಞರ ಕಾರ್ಯವೈಖರಿ ಅತ್ಯುತ್ತಮ. ಕನ್ನಡದಲ್ಲಿ ತೀರ ಅಪರೂಪದ ಕಥೆ ಇದು. ಪ್ರೇಕ್ಷಕ ಕೊಟ್ಟ ದುಡ್ಡಿಗೆ ಮೋಸವಾಗದ ಚಿತ್ರವಿದು ಎಂದರು.

ಭಾರತೀಯ ಪುರಾಣವನ್ನು ಆಧರಿಸಿ ಈ ಚಿತ್ರದ ಕಥೆಯನ್ನು ಹೆಣೆಯಲಾಗಿದೆ. ಧನ್ವೀರ್ ಜೋಡಿಯಾಗಿ ಸಂಜನಾ ಆನಂದ್ ಕಾಣಿಸಿಕೊಂಡಿರುವುದಾಗಿ ನಿರ್ದೇಶಕ ರಘು ಕುಮಾರ್ ನೀಡಿದ ವಿವರ.

ಸಾಧುಕೋಕಿಲ, ಶರತ್ ಲೋಹಿತಾಶ್ವ , ಶೊಭ್ ರಾಜ್, ಅಶ್ವಿನಿ ಗೌಡ, ಗಿಲ್ಲಿ ನಟ ಮುಂತಾದವರು ತಾರಾಬಳಗವಿದೆ ಎಂಬ ವಿವರ ಬಂತು.

ಜ್ಯೂಡಾ ಸ್ಯಾಂಡಿ ಸಂಗೀತ ನಿರ್ದೇಶನ, ಗಿರೀಶ್ ಆರ್ ಗೌಡ ಛಾಯಾಗ್ರಹಣ ಹಾಗೂ ಕೆ.ಎಂ.ಪ್ರಕಾಶ್ ಸಂಕಲನವಿರುವ ಈ ಚಿತ್ರಕ್ಕೆ ಶೈಲೇಶ್ ಕುಮಾರ್ ಹಾಗೂ ಚೇತನ್ ಸಿದ್ ಸಂಭಾಷಣೆ ಬರೆದಿದ್ದಾರೆ. ‌ ‌ ‌ ‌‌‌‌ ‌